Rublev a tla nghal

Qatar Open 2025 champion a nih hnua a match hmasa berah Andrey Rublev a chak lo - Thawhlehni zan khan Russian tlangval hian Dubai Championship a khel a, hneh nei loin a zinkawng a tawp nghal a ni.

Center Court-a inkhelah Rublev hi chak tura rinkai zawk chu a ni, world number 9 thar niin beisei pawh a nei sang. Mahse, a khingpui world number 77 Quentin Halys lakah 3-6, 6-4, 7-6 (5) in a chak lo.

Halys hian tennis a khelh hun chhungin world number 10 chin a hneh vawi khatna a ni a, a tan chuan chanchin lawmawm bik a ni - a match lehpekah chuan Roberto Bautista Agut a hmachhawn ang.

Inkhel dangah Daniil Medvedev a chak, seeded pakhatna hian a khingpui Jan-Lennard Struff chu 6-4, 7-6 (4) in a hneh a, a match vawi hnihnaah chuan Giovanni Mpetshi Perricard a tum leh dawn a ni.

Seeded pahnihna Alex de Minaur erawh a chak lo - Australian tlangval hi 2014 US Open champion Marin Cilic lakah 6-2, 3-6, 6-3 in a chak lo. Nuno Borges chuan seeded pariatna Arthur Fils 6-2, 6-1 in a hneh bawk.

Thawhlehni zan inkhel dangah - seeded pangana Ugo Humbert, Matteo Berrettini, Felix Auger-Aliassime leh Christopher O’Connell te chuan an khingpui ṭheuh an hneh bawk a ni.