Saints-in Everton chak record ti tawp

Pathianni zan khan Southampton-in Everton 2-0 in an hneh a, Premier League-ah match zawng zawng tlawm loh nei an awm ta lo.

Toffees hian match ruk aṭangin point 13 an hmu a, champion lai Liverpool nen an point hmuh zat inang mah se goal difference hmangin pakhatna erawh an la ni chhunzawm.

St. Mary's Stadium-ah Saints an khel ṭha a, Southampton tan James Ward-Prowse leh Che Adams ten first half-ah goal khat ve ve an khung a, Danny Ings-a siamsak ve ve a ni.

Everton captain Lucas Digne chu minute 72-naah Kyle Walker-Peters a rah palh avangin hnawhchhuah a ni a, Carlo Ancelotti hote tan thawhchhuah ngaihna a awm lo.

Toffees hian Liverpool nena hnawhchhuah Richarlison-a awm lo an tuar a, James Rodriguez awm mah se Saints tlarhnung an chhaih buai pha lo.

Everton manager Carlo Ancelotti chuan, "Red card an pekna kha a nuihzatthlak. Liverpool nen kan inkhelh zawhah Pickford leh Richarlison-a chungchang an sawi zui nasat vangah ka ngai. Match thum hrem a ngaih phah dawn a, thil dik a nih theih loh avangin kan khinglet ang," tiin referee thutlukna pawm a har thu a sawi.