Atletico tan insiamremna hun ṭha

UEFA Champions League khelh chhunzawm a ni dawn. Atletico Madrid-in an match hmasa berah Bayern Munich 4-0 in an hneh lo a, zanin dar 1:30 hian RB Salzburg an mikhual dawn. Group A inkhel dangah champion lai Bayern Munich-in zanin dar 11:25-ah Lokomotiv Moscow an tlawh bawk ang. 

Diego Simeone hoten Inrinni zan khan La Liga-ah Real Betis 2-0 in an hneh a, an khingpui tur Salzburg hian Austrian Wien 2-0 thoin an hneh ve bawk. Atletico hi club langsar zawk an ni a, chak tura rinkai pawh an ni.

Atletico Madrid hi La Liga-ah panganaah an awm mek a, Champions League match hnuhnung bera Bayern Munich laka an mualpho bawk avangin uluk zawka zir chiang lo chuan kum dang aia ṭha lo zawk turah an ngai thei ang.

Amaherawhchu statistics hi uluk lehzuala bihchian chuan Atletico-in match nga chauh an la khel a, khelh zat inangah hmahruaitu an la ni thei. Simeone hote hi La Liga-a chak loh nei lo awmchhun an ni a, match nga khelhah vawi li clean sheet tawhin goal khat chiah an la chhuah.

Bayern lakah goal li chhuah mah se Atletico hi dah hniam tur an ni lo a, Salzburg an hneh theih chuan knockout stage a hnai sawt dawn. Barcelona aṭanga an lakluh Luis Suarez-a'n goal li a khung tawh a, Spanish player, midfield leh forward-a chhawr kawp theih Marcos Llorente pawhin goal hnih khung tawhin Diego Costa, Yannick Carrasco leh Joao Felix te an kawl a, UCL lamah pawh goal an khung tawh ngei a beiseiawm hle.

Salzburg hi dahniam tur erawh an ni lo, Austrian champion an nih bakah Erling Haaland leh Takumi Minamino te chher chhuaktu hian player ṭha dang pawh an la chher chhuak zel dawn. Tun season-a an striker kum 22 mi Patson Daka leh kum 20 mi Sekou Koita te hi club lian zawk pawhin an la rim thuai ang.

Bayern Munich hming a rik rualin Robert Lewandowski sawi tel nghal a ngai a, Lokomotiv Moscow pawhin German champion hi chelh an duh chuan Polish striker hi an dah theih a ṭul dawn. Amaherawhchu Moscow tana buaithlak erawh Bavarians hian player ṭha dang an ngah.

Hansi Flick-a hote hian match hnuhnung paruk aṭangin goal 23 an khung a, goal thum aia tlem khung an nei lo. Covid-19 positive vanga match hnuhnung pahnih khel lo Serge Gnabry pawh a negative tawh a, test result hi 'false positive' ah ngaih a nih avangin Lokomotiv Moscow a hmachhawn thei dawn.

Club pahnih hi kum 1995 khan UEFA Cup first round-ah an inhmachhawn a, Lokomotiv hian Allianz Arena-ah 1-0 in hnehna chang mah se Bayern hian Moscow-ah 5-0 in an hneh let. Kum 25 hnuah Russian club aiin German club hi an la ṭhang duang zawk a, an muala khel tur ni mah se Lokomotiv hian hnehna an chang a nih chuan thil makah a ngaih theih ang.