Afghanistan-in England an vaw chhuak

ICC Champions Trophy-ah England-in Nilaini zan khan Afghanistan an hneh lo a, beisei tur an nei tawh lo. Vawiin chawhnu dar 2:30 hian Afghanistan-in Australia an hmachhawn lehnghal dawn a, semifinal khel tur zawnna inkhel pawimawh a ni ang.

Gaddafi Stadium-ah England-in bul an ṭan chhe lo a, over 9 a zawhin Afghanistan-in 37 runs chauh an la siam a, wicket thum an hloh tawh. Mahse, opener Ibrahim Zadran-a'n dinhmun ṭhaa Afghanistan a rawn dah a, 177 runs a siam. Zadran hi captain Hashmatullah Shahidi (40), Azmatullah Omarzai (41) leh Mohammed Nabi (40) ten an thlawp ṭha bawk.

Afghanistan-in over 50-ah 325/7 an siam phak avangin England tan hmabak a harsa a, Joe Root-a'n 120 runs siamin a out. Root a chhuah hian England-in ball 26 aṭangin 39 runs siam chauh an mamawh tawh a, hemi hnu pawh hian kawng dik a zawh zel. Ball 14 aṭangin 17 runs chauh an mamawh zui a, chak ngei tura ngaih an ni.

Mahse, 32 runs siam tawhtu Jamie Overton-a ball vuak chu Azmatullah Omarzai-a'n a mansak a, England an tho chhuak lo. Tail ender hoin run siam an harsat a, run khat te te bak an siam thei lo. Over 49.5-ah 317 runs siamin England an thi fai vek a, run riatin an chak lo a, inelna aṭangin an tla.

England-in 2019 World Cup leh 2022 T20 World Cup nomawi an chawi a, tun hnaiah erawh an che chhe takzet. World Cup 2023-ah group stage an paltlang lo a, nikuma T20 World Cup-ah semifinal lut mah se tun ṭum ICC Champions Trophy-ah match hnih khelhah chak lo ve vein an tla nghal.