Aizawl FC tan beiseina thar a awm

AIFF Disciplinary Committee chuan nimin khan thuchhuah an siam a, Churchill Brothers-in foreigner hman theih aia tam an hman avangin Aizawl FC chu 3-0 a chakin an puang. Relegation zone-a awm mek Mizo club tan chanchin lawmawm a ni a, SC Bengaluru nen an inkar point ruk ni hman chu point li chauh a ni tawh ang.

February 17, Thawhṭanni khan RG Stadium-ah Aizawl FC leh Churchill Brothers te an inkhel a, 1-1 in an inhnehtawk. He inkhelah hian Churchill foreinger Jose Luis Moreno chu hnawhchhuah a ni a, hemi hnu hian Goan club hian Ivorian defender Aubin Kouakou dah lutin Indian player Kingsley Fernandes an la chhuak.

I League danah playing XI-ah foreigner pali chauh a chhawr thei a, foreigner-in red card an hmu a nih chuan an foreigner chhawr theih zat hi a tlem nghal bawk. Churchill hian foreigner pathum chauh an chhawr theih tawh laiin player pali an chhawr a, hremna an tawh phah.

Namdhari leh Inter Kashi inkhelh ṭum pawhin Namdhari-in foreigner an hmang tam a, Edmund Lalrindika telna Inter Kashi chu 3-0 a chaka puan an ni. AIFF Disciplinary Committee thutlukna avangin table pawh a danglam phah hle. Inter Kashi chu hmahruaitu an ni a, Churchill Brothers aiin point thumin an hmu tam zawk.

Aizawl FC-in an chunga awm SC Bengaluru chu point thum chiahin an pha tawh lo a, an point hmuh zat a inang a nih chuan head to head en tur a ni. March 3, Thawhṭanni hian Aizawl FC-in khualmualah SC Bengaluru hi an hmachhawn ang a, hnehna an chang a nih chuan relegation zone an chhuahsan ang.