Morbidelli hun a thleng ve ta

Pathianni tlaia tlan zawh tak MotoGP Teruel Grand Prix-ah Franco Morbidelli chuan hnehna a chang a, rider championship lamah pawh nomawi chawi a beiseina a chhawm nung zel bawk a ni.

Petronas Yamaha rider hian pahnihna aṭangin inelna bul a ṭan a, Spanish rider pahnih Alex Rins leh Joan Mir te nen na taka an inelna karah a dingchang a, a hnungah hian Rins thlengin pathumna chu Mir a ni thung.

Italian tlangval Morbidelli chuan, "Ka theihna zawng zawng ka hlan a, team lam pawhin a ṭha thei ang berin min thlawp bawk. Chawlh hmanga hun nuam tak hmang ang maiin engkim kha a nuam em em vek mai a ni," a ti.

Season kal laiah rider hrang hrangin hnehna an inchan chhawk kual nasa, championship-ah pawh hmahruai fal thei an awm lo. Point 123 hmua a chung ber dinhmun luahtu Mir hian kuminah pakhatna dinhmun a la luah miah lo!

MotoGP champion lai Marc Marquez chu hliam vangin a la inlan thei lo, Honda rider awm loh karah mimala langsar thei an awm lo. Sulhnu langsar neitu Valentino Rossi chu coronavirus a kai avangin tun hnaiah a zawnin vawi hnih a inlan thei ta lo a ni.