Real Madrid tan Endrick

Copa del Rey semifinal first leg-ah Real Madrid an chak nghal a, an mikhualna ramah 1-0 in Real Sociedad an hneh - Endrick chuan inkhela goal awmchhun a khung.

Sociedad khelmualah Real-in an ṭhat dan berin player rem lo mah se, harsatna liantham an tawk lo a, minute 19-naah Endrick hian goal hmahruai a khung - Jude Bellingham siamsak a ni a, English midfielder hian Brazilian forward tan ṭha zetin a siamsak.

Kum 18 mi Endrick tan Real a pan hnua goal ruk a khungna chiah a ni a, heti zat khung tur hian match 25 a mamawh - Copa del Rey bikah chuan match lia goal li a khungna a ni.

Real hian goal khung belh theihna remchang pawh an nei a, mahse, an chhawr lo. Endrick hian goal hnih khung theihna remchang nei mah se, uiawm takin crossbar a tihper a, Bellingham-a chance neih chu Real Sociedad goalkeeper Alex Remiro chuan ṭha zetin a dansak bawk.

Nimin zing inkhelah hian Real keeper Thibaut Courtois leh Federico Valverde te chu chawlh hahdamtir an ni a, Kylian Mbappe pawh a ha phawi a nat deuh avangin a inlan thei lo.

A tawpah erawh Real an chak ta tho a, a vawi 21 nana champion ngei tumin final kalkawng an zawh zel. April 1 zanah second leg khel turin Sociedad an mikhual ve thung dawn a, Santiago Bernabeu-ah a nih dawn miau avangin tlang ngei an inbeisei ang.