Champion lai Juventus an tla

Coppa Italia champion lai Juventus chuan an nomawi an hloh chiang ta - Nilaini zan quarterfinal inkhel hmuhnawmah Old Lady hi Empoli nen hun pangngaiah 1-1 in an inhnehtawk a, penalty shootout neih niin Empoli hi 4-2 in an chak.

Empoli hian semifinal-ah Bologna an hmachhawn dawn a, inkhel dangah AC Milan leh Inter Milan te an inkhel thung ang. April 2 leh 23-ah te semifinal khelh tur niin May 14 hian Stadio Olimpico, Rome-ah a hmawr bawk a ni ang.

Allianz Stadium-ah team ṭha zawk leh mualneitu Juventus chu chak tura rinkai zawk an ni. Mahse, mikhual tan Youssef Maleh chuan minute 24-naah goal hmahruai a khung, second half-ah Khephren Thuram chuan a sut.

Goal dang a luh zui loh avangin penalty shootout neih a ni. Juventus tana pet hmasa bertu striker Dusan Vlahovic leh palina a pettu Kenan Yildiz ten an hlah laiin Empoli lamin tana pettu hmasa paliten an khung vek thung.

Juventus manager Thiago Motta chuan, "A zahthlak ka ti hle, hnehna chang tur chuan ṭha taka beih a ngai a, kan chet danin a phu a ngai bawk, tun ṭumah kha chuan chutiang chu ka hmu lo.

"A bik takin first half kan khelh dan khan min ti zak, keimah ang bawkin player lam pawh zakin an kun ngei ka ring. Semifinal kan luh loh chhan chu a thiam pali zinga tel phu khawp in kan khel lo," tiin a naute khelh danah a lawm lo hle.

Old Lady tan hian Serie A nomawi beisei ngam a ni tawh chiah lo a, Champions League lamah PSV Eindhoven hneh loin an tla bawk - Coppa Italia nomawi an kawl lai an hloh leh ta a, tunah chuan a sang thei ang bera league khar chu an tum tur a ni tawh ang.