David-a'n East Bengal chakpui

East Bengal chuan Indian Super League playoff khel turin an beiseina an chhi nung ve zel a, Nilaini zan khan an mikhual Hyderabad chu 2-0 in an hneh.

Kolkata club hi goal khung loin an awm reng a, team pahnih hi an inhnehtawk mai a rinawm hman. Mahse, minute 86-naah bench aṭanga luhtir David Lalhlansanga a inlar a, a team a chhanchhuak.

Vairengte striker hian Venezuela international Richard Celis-a corner pet chu a tauh lut a, hun tawp dawnah beiseina an nei thar. David-a ball tauh hian Hyderabad defender Manoj Mohammed-a lu a per avangin own goal anga tarlan a ni.

Kolkata club hian an duhtawk mai lo, hun pek belh minute linaah Raphael Messi Bouli chuan a khung ve leh a, goal dang lut tawh loin East Bengal an chak chiang.

Óscar Bruzón enkawlna hnuaia khel East Bengal hi table-ah pariatna an ni mek a, playoff khel phak china awm Mumbai City chu point nga chiahin an phak lo mek - match hnih chiah khelh tur an neih tawh avangin playoff khel tur erawhin thilmak an beisei tel a ngai thung ang.

East Bengal tan Lalchungnunga'n inkhel bul a ṭan a, Hyderabad lamah Ramhlunchhunga chu bench aṭangin a lut ve bawk.