Real hmachhawn thei tur Antony

Real Betis tan chanchin duhawm hriat tur a awm. March 1, Inrinni zana Real Madrid an mikhual hunah Betis-in Manchester United aṭanga loan hmanga an hawh Antony an chhawr thei dawn.

Betis hian Pathianni zan khan Getafe an hmachhawn a, 2-1 a nih laiin injury time-ah Antony hi hnawhchhuah a ni. Brazilian forward hi Real Madrid hmachhawn thei lo tura ngaih ni hman mah se hremna hi an sut a, Los Blancos a hmachhawn thei ang.

Antony hian Real Betis a zawm hnuah hmun pawimawh a chang nghal a, match ruk khel tawhin bul a ṭan vek a, goal thum a khung tawh. Manuel Pellegrini-a'n Antony hi a ring ngam a, a rintlak hle.

Brazilian forward hian La Liga-ah goal hnih leh assist vawi hnih a nei tawh a, Europa Conference League-ah goal khat a khung tawh bawk.