Beisei phak lo Pirlo leh Juventus

Italian champion Juventus chuan an manager thar Andrea Pirlo kaihhruaina hnuaiah beisei an la phak lo hle. Pathianni zan Serie A inkhelah Old Lady hi an mikhual Hellas Verona nen 1-1 in an inhnehtawk a, table-ah pangana dinhmun an luah.

Inkhel dangah Napoli chuan Benevento 2-1 in an hneh thung, nizan khan league hmahruaitu AC Milan leh AS Roma an inhmachhawn a, he thu buatsaih lai hian result kan hre hman lo - Milan hian league match li khelh tawh chinah hnehna an chang vek.

Allianz Stadium-a inkhelah Juve striker Alvaro Morata goal khung chu VAR hman a nih hnuah offside vanga pawm a ni lo, Spain international hian Dejan Kulusevski goal khung tur erawh a siamsak tho.

Mahse Kulusevski-a'n goal a khung hma hian Verona tan Andrea Favilli chuan goal a khung hman a, team pahnih hi point hnih ve veah an lungawi a ngai. Pirlo naute hi legaue match pangaah an la tlawn lo, amaherawhchu vawi thum ngawt an khingpui nen an inhnehtawk.

Juve manager Pirlo chuan, "Thawh harh kan ngai, na leh khauh taka in nawr ngai kher loin khelmual chhungah hian nung taka kan khelh a ngai a ni," tiin a naute khelh dan chungchang a sawi, a beisei angin an phur tawk lo niah a ngai.

Juventus an hma-chhawn theih loh vangin Napoli-in point thum an hloh a, an point hmuh sa paih ṭhensak an ni bawk. Gennaro Gattuso naute an hnual mai lo, Lorenzo Insigne leh Andrea Petagna te goal hmangin Benevento 2-1 in an luhchhuah.

Benevento tana goal khungtu hi Roberto Insigne a ni a, minute 30-naah a team hma hruai pui mah se a u leh player langsar zawk Lorenzo Insigne chuan second half-ah sutin a team a chak pui chhunzawm bawk.

Napoli captain Lorenzo chuan, "Kan chhungkaw tan chuan ni hlimawm leh chhinchhiah tlak a ni a, inkhelh zawh khan a bulah kalin a goal khung ka lawmpui," a ti a, fiamthuin a nau aiin a ke vei lam pawh a ṭhat zawk thu a sawi tel zauh bawk a ni.