Silva telna Sociedad-in La Liga-ah hma an hruai

Manchester City a chhuahsan hnuah pawh David Silva 'magic' hmuh tur a la awm reng a, Spanish playmaker hian a club thar Real Sociedad chu La Liga-ah hma a hruai pui. 

Pathianni zan La Liga inkhelah Sociedad hian 4-1 ngawtin an mikhual Huesca chu an sawp a, Silva hian a kum tam tawh mah se a thiam a la theihnghilh lo tih pholangin goal hnih a assist. 

Sociedad tan Mikel Oyarzabal chuan goal hnih a khung a, Cristian Portu leh Alexander Isak-ten goal khat ve ve an khung ve bawk. Huesca tana Rafa Mir goal khungin awmzia a nei lo.

 

Sociedad-in minute 35-naah penalty an hmu a, Spanish forward Oyarzabal chuan hei hi goal-ah a chantir nghal - goal a lut hma a, chawlhlawk hmain goal dang a lut tawh lo thung. 

Spain tan vawi kua inlana goal thum khung thei Oyarzabal hi kum 23 chauh a la ni a, Real Sociedad tana a sulhnu thlirin football khawvela hming langsar ni turin theihna a nei. 

Second half ṭantirah Huesca-in Rafa Mir hmangin an si phurh an sut a, team pahnih hi point khatah an lungawi mai dawn niin a lang hman - Spanish forward Mir hi Wolverhampton Wanderers aṭanga Huesca-in loan-a an hawh a ni. 

Season hmasaa Champions League khelh phak hial beisei hman khawpa season duhawm hmangtu Sociedad-in tlawm an duh lo a, game thlak danglam thei khawpa thiam bik Silva an nei bawk. 

Minute 54-naah Oyarzabal bawkin hmahruaina goal a rawn khung leh a, a bak chu Silva 'show' a ni. City midfielder hlui hian minute 68-naah Cristian Portu goal khung tur a siamsak a, 3-1 a ni. 

Nipui transfer laia thawm nei ring tak Alexander Isak chuan minute 75-naah European club liante chil a tih put chhan pholangin a khung leh a, hei pawh Silva siamsak bawk a ni - hun a tawp a, 4-1 in Sociedad an chak. 

Kum 34 mi ni tawh Silva hian nipuiah khan City-a a contract a hmang zo a, Premier League club hian chelh duh mah se hmun pawimawh a chan tawh loh avangin chhuahsan a thlang. 

Lazio-a kal tur angin a lang hman a, a tawpah mahni ram lama kir thlangin Real Sociedad tan season hnih khel turin contract a ziak - a thiam a la theihnghilh lo. 

January 2010-a Valencia tana Villarreal laka assist vawi hnih a neih hnua a vawi khat nan La Liga match khatah assist vawi hnih a nei a, kum 2000 hnua Sociedad tana La Liga match khata assist vawi hnih nei thei upa ber a ni - kum 34 leh ni 291 mi a ni.