Arsenal ngam loh Jamie Vardy

Jamie Vardy chu Arsenal tana anchhia a nihna a la reh lo. English striker hian bench aṭanga a luh hnuah goal pawimawh tauh lutin Leicester City chu Emirates Stadium-ah 1-0 in hnehna a chanpui.

Pathianni zan Premier League inkhela an chak avangin Foxes chuan kum 1973 hnua a vawi khat nan Gunners chu an mualah an hneh, manager Brendan Rodgers-a naute hian a vawi khat nan season tir lamah a zawnin khualmualah match thum hnehna an chang ta.

Thomas Partey-a'n a vawi khat nan Premier League-ah bul a ṭan a, tlarhma lamah Pierre-Emerick Aubameyang leh Alexandre Lacazette te an awm avangin beiseina an nei sang a, a tir lamah pawh goal an nawr na hle.

Chawlhlawk hmain goal khung tumin vawi 11 ngawt an pet a, mahse keeper Kasper Schmeichel tan hna hautak tak a awm lem lo. Striker Lacazette-a'n ṭha takin a tauh lutah in ngai mah se, midfielder Granit Xhaka leh Auba te an offside avangin pawmsak an ni lo.

Gunners manager Arteta chuan, "Kan goal an pawm lo kha chu a mak hle a, ka lungawi lo takzet," a ti. Spanish manager naute hi league match ruk an khelh aṭangin vawi thum an tlawm der tawh, a sang pali zinga tel phak pawh a harsa dawn.

Chawn hliam vangin match hnuhnung pahnihah Vardy a inlan thei lo a, Gunners lakah pawh a bul ṭantu zingah a tel lo. Team pahnih goal an khung theih loh laiin Rodgers-a'n English striker a dah lut a, mamawh chhanna a ni.

Kum 33 mi Vardy hian amah ang bawka substitute bench aṭanga lut Cengiz Under-a cross chu chiang takin a tauh lut. Hliam vanga lak chhuah David Luiz thlaktu Shkodran Mustafi-a'n a ven tur a ven loh vangin changtu nei loin hnai takah ball a tauh.

Vardy-a'n league match bikah Arsenal vawi 11 a hmachhawn aṭangin goal 12 ngawt a khung thei; EPL bikah chuan club mala goal a khung hnem berna a ni. Rodgers chuan, "Inkhel pawimawh leh boruak sangah goal a khung ṭhin," tiin a player chu striker ṭha bik a nih thu a sawi.