Stokes-a'n Rajasthan beiseina a siam
Indian Premier League-ah league stage khelh tur a tam tawh lo chungin player khel tur a la chiang thei lo. Pathianni zan khan Rajasthan Royals-in Ben Stokes century hmangin hmahruaitu Mumbai Indians an hneh a, playoff khel turin beiseina thar an neih phah. Inkhel dangah Chennai Super Kings-in Royal Challengers Bangalore an hneh ve bawk.
Zanin dar 7:30 hian hian Dubai International Cricket Stadium-ah Sunrisers Hyderabad leh Delhi Capitals te an inkhel dawn a, Sunrisers tan playoff khelh beiseina chhi nung turin chak ngei a pawimawh tawh ang.
Stokes a che ṭha
Sheikh Zayed Stadium-ah Mumbai Indians-in bat hmasak an thlang. Opener Ishan Kishan (37) bakah Suryakumar Yadav (40), Saurabh Tiwary (34) leh Hardik Pandya (60) te an che ṭha bawk a, run 195/5 siamin chak turin an dinhmun a ṭha hle.
Royal Rajasthan bat hun a thleng a, opener Robin Uthappa-a'n run 13 chauh siamin thi mah se a kawppui Ben Stokes erawhin thi loin ball 60 lekah run 107 a siam. Mumbai target a san em avangin Stokes-a'n puitu a mamawh a, Sanju Samson-a'n thi loin run 54 a siam ve bawk a, over 18.2-ah run 196/2 siamin Royals-in wicket riatin hnehna an chang.
Bangalore an chak lo
Royal Challengers Bangalore-in playoff khel turin point mamawh tam tawh lo mah se Chennai Super Kings an hneh loh avangin la vanduai thei an ni. Bangalore-in bat hmasak a thlang a, over 145/6 chauh an siam. Captain Virat Kohli-a'n run 50 a siam a, amaherawhchu thlawptu ṭha an neih loh avangin chak turin bowler-te ṭanpuina an mamawh.
Chennai tan opener Ruturaj Gaikwad-a'n thi loin run 65 a siam a, chak turin hna harsa a awm lo. Captain MS Dhoni pawhin thi loin run 19 a rawn siam ve bawk a, over 18.4-ah run 150/2 siamin wicket riatin hnehna an chang.