Zverev tan Cologne nomawi

Alexander Zverev chuan Diego Schwartz-man hnehin Cologne Open nomawi a chawi a, kar hmasa lawk khan Cologne khawpuiah bawk hian Bett1HULKS Indoor title a lak bawk avangin tun hnaiah a che ṭha hle.

Seeded pakhatna Zverev tan Schwartzman hneh turin harsatna a awm lo, darkar khat leh minute 11 chhung lekin Argentine tlangval hi 6-2, 6-1 in a hneh. Player pahnih hi vawi li an intawnna niin, ṭum hnih ve ve hnehna an chang ta chiah.

World number 7 Zverev chuan, "Kar hmasa lawk kha chuan tournament ka khel tluan thei ang em tih kha zawhna a ni a, tunah chuan a zawnin nomawi ka chawi ta der mai," tiin a sawi, tun laiah coronavirus vanga buaina a tam thu a sawi bawk.

German tlangval hi tennis player beisei awm ber zinga mi a ni a, inelna lianah erawh a che fuh lo leh ṭhin. Thla hmasa a khelh zawh tak US Open-ah khan final a lut a, mahse a ṭhianpa leh elpui ni bawk Dominic Thiem a ngam lo.

Kar hmasa chhung khan European Open khelh a ni bawk, Antwerp-a inelna neihah French tlangval Ugo Humbert chuan Australian player Alex de Minaur chu 6-1, 7-6 (7-4) a hnehin ATP title pahnihna a la ve bawk.