Real Madrid tan chak a ṭul

Champions League-a record nei ṭha ber Real Madrid hi group B-ah Inter Milan, Borussia Monchengladbach leh Shakhtar Donetsk te an awm. Spanish club lian hian an match hmasa berah team nem ber tura ngaih Ukrainian club Shakhtar lakah 3-2 in an tlawm a, an muala chak lo an nih bawk avangin an hmabak a harsa sawt dawn.

Zanin dar 1:30 hian Los Blancos-in Bundesliga club Monchengladbach hmachhawn turin Borussia-Park an tlawh dawn. German club hi Inter Milan nen 2-2 a inhnehtawk an ni a, Italian club hian zanin dar 11:25 hian Shakhtar Donetsk an hmachhawn ve thung dawn.

Real Madrid manager Zinedine Zidane chuan, "Kan thawhrim chhunzawm a ṭul a ni," tiin chhuanlam a hran a siam lo a, Spanish club hian El Clasico-ah Barcelona 3-1 a an sawp zui avangin inrintawkna an ngah sawt ang. Los Blancos hian captain Sergio Ramos pawimawhna an hrechiang a, Spanish defender hi a chhuak a nih chuan Cristiano Ronaldo ang thoin a hmunruak hnawhkhah a har dawn.

Hemi a nih avang hian Real Madrid hian Ramos hi contract pawhsei tumin an dawr mek a, Shakhtar Donetsk nen an inkhelh ṭuma an chak loh chhanah pawh Ramos awm lo hi a mawhpuh theih. Monchengladbach nen erawh kum 34 mi Ramos hi an chhawr thei tawh dawn a, tlarhnunga phui sawt ang.

Real khingpui tur Borussia Moncheng-ladbach hian an match hnuhnung berah Mainz 3-2 in an hneh. Gladbach hian German player ṭha Jonas Hofmann, Florian Neuhaus,Lars Stindl leh Matthias Ginter bakah ram pawn player Ramy Bensebaini, Marcus Thuram, Alassane Pléa leh Yann Sommer te an kawl a, Zinedine Zidane leh a hote tan hna a awlsam dawn lo.