Champions League Liverpool leh City an inlan dawn

Premier League champion Liverpool leh Manchester City-ten zanin dar 1:30-ah Champions League match khelh tur an nei dawn a, hmabak hautak erawh a ni lo. 

Liverpool hian Danish club ṭha FC Midtjylland an mikhual dawn a, Anfield-a inkhel tur an nih bawk avangin Jurgen Klopp-a naute hi chak tura rin ngam an ni. 

Manchester City erawh Liver-pool aiin an match a hautak zawk dawn a, khualmualah French club sulhnu nei ṭha Marseille an lenchilh dawn. 

Hliam vanga talbuai mek City hian tun season-ah beisei ang result an nei hleithei lo a, West Ham laka point khat hlawh chhuak team an nih avangin chak tura rin zawk ni mah se chak chiang saa chhiar erawh an rem lo. 

Liverpool-in player inhliam an ngah avangin an talbuai a, Covid-19 kai an awm leh ṭhin bawk avangin duh anga player chhawr theih loh hian squad-ah nghawng a nei tih loh rual a ni lo. 

Mahse, Reds hian hun rei tak chhung Virgil van Dijk an chhawr thei dawn lo tih an hriat chian tawh avangin an defender chhuanvawr tel loa insiamrem an zir ṭan a, chanchin lawmawm lo kara lawmna thlen turin goalkeeper Alisson Becker chu beisei aia hmain a dam ta bawk. 

He thu buatsaih lai hian Joel Matip dinhmun a la chiang lo a, mahse Fabinho-a'n tlarhnung laia khelh a thiam sa avangin Joe Gomez-a kawppui turah harsatna awm tura ngaih a ni lo. 

Hetihlai hian mahni chauha game thlak danglam thei khawpa midfielder thiam bik Thiago Alcantara dinhmun pawh a la hriat theih lo a, Thiago hi a inlan thei a nih chuan Midtjylland tan inkhelh ṭan hma hauhin chak beiseina a tlem belh ang. 

Reds-in an league match hnuhnung berah Sheffield United chu 2-1 in an hneh a, an khelh dan enin Liverpool hi inchhuang viau tur erawh an ni lo - lawmna tur erawh a awm. 

Jurgen Klopp-a naute hian season hmasa khan an khelh ṭhat loh ṭum pawhin hnehna an chang hram ṭhin a, chu chu league bikah chuan an champion-na hnar a ni - Champions League-ah Ajax chu Klopp-a'n player zingah 'risk' a la chungin 1-0 in an hneh tawh bawk. 

Midtjylland erawh an match hmasa bera Atalanta laka goal li chhuahtu team an ni a, Italian club laka heti zat goal chhuahtu hian Roberto Firmino, Mohamed Salah leh Sadio Mane lakah goal an venhim viau a rinawm loh - Diogo Jota a la awm cheu. 

Danish champion tan Reds laka point hlawh chhuak tur chuan  Anders Dreyer chet ṭhat a pawimawh a, kum 22 mi midfielder hian tun season match 10-a khelhah goal nga khungin assist vawi li a nei tawh. 

Pep Guardiola enkawl City leh talbuai tih ṭawngkam hi hman kawp inhmeh lo tak a ni ṭhin a, tun season-ah erawh thawnthu a danglam - he team hi an pu ber Pep hoin an talbuai!

City hian Champions League-a an match hmasa berah goal an chhuah hmasak zet hnuin FC Porto chu 3-1 in an lehthal a, mahse Premier League-ah West Ham chu 1-1 in an inhnehtawkpui zui. 

Pep-a enkawl team hian league-ah 13-na dinhmun an luah mek a, match nga an khelh tawhah vawi hnih chiah an la chak - vawi hnih an khingpui an inhnehtawkpui a, vawi khat an tlawm. 

Team hmachhawn châkawm lo ni ṭhin kha an ni tawh lo a, an insiamṭha viau a nih ngawt loh chuan Leicester City ngam lo a, Leeds leh Hammers inhnehtawkpuitu team hi Marseille lakah chak chiang saa sawi an rem lo. 

City hian hliam vangin Aymeric Laporte, Benjamin Mendy leh Gabriel Jesus an chhawr thei dawn lo chiang a, a bik takin season hmasaah Laporte tel loa City tlarhnung nghinzia kan hmu tawh.

Hliam vanga talbuai ngun ve tak Sergio Aguero chu Hammers lakah hliam vangin lakchhuah a ngai a, he thu buatsaih a nih thleng hian a dinhmun a chiang lo - tun season-ah hliam vangin match nga a khel tawh lo.

Argentine striker hi a inlan thei lo a nih chuan City-in striker pangngai nei lo chungin Marseille an hmachhawn dawn tihna a ni a, mahse Raheem Sterling leh Kevin de Bruyne-te an nei tih hriat a ṭha. 

Marseille-in player inhliam langsar sawi tur an nei lo a, English football-a a 'magic' lo 'show' tawhtu Dimitri Payet an kawl avangin City hmachhawn turin an inbuatsaih ṭha ang.