Kane tan nomawi a hnai

Champion a duh vanga Bayern Munich zawmtu Harry Kane chuan a duh a hmu dawn hnai - Inrinni zan Bundesliga inkhelah Bavarians hian Stuttgart chu 3-1 a hnehin point thum an hlawh chhuak.

Stuttgart tana Angelo Stille-a goal khung chu mikhual lamin Michael Olise, Leon Goretzka leh Kingsley Coman te hmangin an chhanglet a, nuamsa takin khualmualah hnehna an chang.

Bayern Munich manager Vincent Kompany chuan, "German football hmuhnawm tak kan hmu. Inkhel tir lamah khan Stuttgart kha team ṭha zawk an ni a, goal pawh an khung. Mahse, kan vuaklet dan khan min tilawm," tiin a sawi.

German club hian hian league match 24 an khel tawh a, point 61 hmuin Bundesliga hmahruaitu an ni. Champion lai Bayer Leverkusen aiin, khelh zat inangah point riat laiin an sang fal ta a, an champion ngei a rinawm ta hle.

Inrinni zan inkhel dangah Bayer Leverkusen chuan Eintracht Frankfurt chu 4-1 in an hneh. Leverkusen manager Xabi Alonso chuan, "Inkhel duhthusam a ni a, Nilaini zana Champions League kan khelh tur atan inbuatsaihna ṭha tak a ni," tiin a sawi.

German champion Leverkusen leh an league nomawi chuhpui mektu Bayern Munich te hi Champions League last 16-ah an intawng dawn; Nilaini zan Allianz Arena-a an inkhel tur hi a hmuhnawm khawp ang.