Dubai-ah Tsitsipas a champion

Hun rei tak hnuah Stefanos Tsitsipas chuan nomawi a chawi ve leh ta - Greek tlangval hian Inrinni zan khan Felix Auger-Aliassime chu straight set hmanga hnehin Dubai Tennis Championship title a la.

Centre Court-a inkhelah, kum 26 mi Stefanos Tsitsipas hi a khel ṭha hle a, a khingpui Canadian mi hi 6-3, 6-3 in a hneh; ama service a hum vek laiin a khingpui service chu vawi thum a chhuhsak thung, a chungnung hle a ni.

Tun hmain Tsitsipas hian Dubai Tennis Championship-ah final vawi hnih a lo khel tawh, kum 2019 khan nomawi inchuhna inkhelah Novak Djokovic a hneh lo, a hnuah Roger Federer ngam loin pahnihna dinhmun bawk a luah.

Tsitsipas chuan, "A hmain final vawi hnih ka khel a, chak lo zawkah ka ṭang. Champion chakin ka tuihal reng a, dawhthei takin ka nghak ngar ngar a ni. Tunah chuan ka lo beisei reng kha a takin ka tawng ve ta, a hlu takzet," tiin a sawi.

Player ṭha tak ni mah se Tsitsipas hi a vanduai thei hle - ATP Finals nomawi a chawi tawh, Grand Slam dawta inelna lianah a champion tihna a ni. ATP 500 tournament final a luh hmasak 11 tehmeuhah chuan a vanduai zawkah a ṭang thung.

Tennis inelna dang Mexican Open-ah Tomas Machac a champion; Czech Republic champion hian Alejandro Davidovich Fokina chu 7-6(6), 6-2 in a hneh - Paris Olympic an neih ṭum khan an ram tan mixed doubles huangah goal medal a lo la tawh bawk.