Dembele hoin PSG an kâng sâng

Paris Saint-Germain chuan Inrinni zan khan an mikhual Lille chu 4-1 in an sawp a, tun hnaiah Ligue 1 match an khelh hnuhnung 10 zetah hnehna an chang fai vek!

Parc des Princes-a inkhelah hian, mualneitu lam tan Bradley Barcola, Marquinhos, Ousmane Dembele leh Desire Doue ten goal khat ṭheuh an khung a, chawlhlawk an hman hmain goal li an khung fel der tawh.

Inkhel chawhnu lamah Lille lamin Jonathan David hmangin an sut ṭhen a, mahse Paris khawpuia inkhelah hian an mualpho tur a hliahkhuh phak tawh lo - Luis Enrique leh a nau ten point thum an hlawh chhuak.

PSG manager Enrique chuan, "Kumin chhung atan chuan first half kan khelh ṭhat ber ṭum a ni hial ang, sawisel tur leh siamṭhat ngai lai chu la awm bawk mah se, a pumpui thlir chuan kan khel ṭha takzetah ka ngai.

"Second half-ah khung belh lo mah ila ka lawm, player ṭhenkhat kha chuan Champions League kan khelh tur an lo ngaihtuah lawk daih tawh tih ka hria, tunah chuan kan chawl zeuh phawt ang a, chumi hnuah ngaihtuahna thar kan seng ang," a ti.

Paris club hian tun season Ligue 1 match 24 an khelh aṭanga point 62 hmuin hma an hruai mek a, anmahni hnaih bertu Marseille aiin point 16 zetin hma an hruai fal, an champion leh ngei a rinawm.

Ligue 1, French Cup leh League Cup te hi PSG lungawina erawh a ni tawh rih lo - Champions League nomawi an duh. UCL last 16-ah Liverpool nen an inkhel dawn a, coach ṭha Enrique leh a naute tan fiahna tak tak chu a ni ang.