Inter leh Napoli inhnehtawk

Serie A champion tuma inum pahnih Inter Milan leh Napoli te chu 1-1 in an inhnehtawk, match khelh zat inangah Inter hian point khata hmu tam zawkin hma an hruai chhunzawm a ni.

Antonio Conte enkawl Naples club hian Inter hi an um ngam - Inrinni zan Stadio Diego Armando Maradona-a inkhelah erawh, mikhual team lamin Federico Dimarco hmangin goal an nei hmasa.

Mikhual team hi an chak tluan teuh hle, mahse hun tawp hma deuhin midfielder Philip Billing chuan si phurh a sut a, goal dang lut zui loin point khat ve vein an insem, team pahnih tan point khat tal hlawh chhuah kha a hlu khawp ang.

Napoli manager Antonio Conte chuan, "Inter Milan hi chuan tuna an team ṭha tak nei tur hian hma an lakna a rei tawh a, vawi leh khata ṭhat thut pawh an ni lo, chuvangin hmachhawn hi an harsa thei em em a ni.

"Champion lai an ni a, kuminah pawh mipui lamin champion tura an rin an ni. Mahse, keini pawhin kan hmachhawn thei a, kan elphak a ni tih kan lantir kha ka lawm, kan inkhelah khan lawmna tur ka hmu hnem hle.

"Como nen kan inkhelh ṭum kha chuan, ka naute khan hnehna chan an chak lo emawni tih mai tur a ni, tunah erawh kan brouak a danglam leh tawh hle a ni," tiin an khelh danah a lungawi tih a sawi.

Chak thei dinhmuna an din hnuah Inter Milan an chak zo lo a, tun season kal laiah hun tawp hma minute 15 chhungin goal 10 ngawt an chhuah tawh, a tawp thlenga fimkhur an zir a ngai hle.

Inter Milan manager Simone Inzaghi chuan, "Season chawhnu lam kan hmang chho mek a ni a, hmabak tam tak kan la nei. Tun ang hunah match 40 kan khel tling tawh a ni a, hun tawp lam hi chu a harsa ṭhin a ni.

"Federico Dimarco a inhliam a, a hmain Carlos Augusto leh Matteo Darmian te an hliam tawh bawk si, kan tan chuan phui ṭha leh rem taka indah dik nghal kha a harsa tawh a ni, point kan hmuh avang erawh chuan a lawmawm," a ti.