Club dang sum hmanin Wenger a tibuai lo

Arsenal manager Arsene Wenger chuan a elpui club dangte sum hman zat leh lakluh zatin a tihbuai hran loh thu leh season thar inbuatsaih nana result ṭha tak an nei chhoh mek chu an chhawm nun zel theih a beisei thu a sawi.

Thawhṭanni khan Chelsea manager Jose Mourinho chuan Premier League a an elpui club-te chuan champion nomawi chu sum hmanga lei an tum nia a hriat thu leh Chelsea sum hman tam sawisel ṭhin tute paw'n sum an hman nasat ve tho thu a lo sawi tawh.

Premier League cham­pion Chelsea hian kum dang ang lo takin tun nipui transfer chhungin Asmir Begovic chiah lei pangngain an la la lut a, Radamel Falcao chu loan-in an hawh bawk. Heng player pahnih an lakte hi Petr Cech leh Didier Drogba te thlakna tur an nih thu Portuguse manager hian a sawi tel bawk.

Pathianni lo awm tur hian London club pahnih Chelsea leh Arsenal te hian Wembley Stadium-ah FA Community Shield an khel dawn a, tun aṭangin manager pahnihte thu hmangin an inbei ṭan der tawh.

Blues manager Mourinho thu sawi chu chhangin Wenger chuan, "Sum hman tur kan nei a nih chuan a ṭulah kan hmang mai a; kan nei lo a nih chuan kan ngawi mai. Midang thusawi hi a nazawng chuan ngaihthlak a ṭul lem lo," a ti.

Gunners director Lord Harris chuan an player duh­zawng lei nan sum an neih thu sawi mah se tun nipui transfer chhungin goalkeeper Cech bak an la la lut lo.

Arsenal hian season thar Premier League-a an match hmasa ber chu August 9 khian Emirates Stadium-ah West Ham nen an khel ang. Wenger a naute hian Barclays Asia Trophy an chawi hnu lawkah Pathianni zan khan Emirates Cup an chawi leh bawk. Season hmasa tawp lam match li chak zawnin goal 14 ngawt an khung theih bawk avangin beiseina an nei sang hle.

A vawi ruk nana FA Cup champion puitu manager chuan, "Kan inbuatsaihna a ṭhat avangin inrintawkna kan neih san phah ang. Kan result ṭha tak hi kan chhawm nun zel theih ka beisei hle. Inelna hautak tak hmachhawn tur chuan inrintawkna hi a pawimawh berte zing ami a ni a, tuna kan rilru put hmang hi a dik rih hle," a ti.

Kum 2013 hnulama Arsenal leh Chelsea sum hman dan

Arsenal

Lut: Mesut Ozil (£42m), Alexis Sanchez (£35m), Mathieu Debuchy (£12m), Calum Chambers (£16m), Danny Welbeck (£16m), Gabriel (£11m), Petr Cech (£10m).

Chhuak : Gervinho (£8m), Thomas Vermaelen (£15m), Carlos Vela (£12m), Lukas Podolski (£1.8m)

Hman ral : £142m; Hralh chhuahna : £36.8m; Inthlauhna: £105.2m.

Chelsea

Lut : Andre Schurrle (£18m), Willian (£30m), Marco van Ginkel (£8m), Nemanja Matic (£21m), Mo Salah (£11m), Kurt Zouma (£12.5m), Cesc Fabregas (£27m), Diego Costa (£32m), Filipe Luis (£15.8m), Loic Remy (£10.5m), Juan Cuadrado (£23m), Asmir Begovic (£8m).

Chhuak : Kevin de Bruyne (£16.5m), Juan Mata (£37m), David Luiz (£40m), Demba Ba (£4.7m), Romelu Lukaku (£28m), Andre Schurrle (£22m), Ryan Bertrand (£10m), Petr Cech (10m), Filipe Luis (£11m).

Hman ral : £216.8m; Hralh chhuahna : £179.2m; Inthlauhna: £37.6m.

*£: pound m: maktaduai