Atletico Madrid-ah Filipe Luis a kir

Chelsea full-back Filipe Luis-a'n kum khat chhung Stamford Bridge-a hun a hman hnuin a club hlui Atletico Madrid lam a pan leh ta. Premier League leh League Cup-a Chelsea champion puitu hi a man zat puanzar a ni lo.

Brazil international hian nikum nipui transfer lai khan Spanish club aṭang hian Chelsea hi a zawm a, a man zat atana Blues-in sum an thehchhuah zat hi pound maktaduai 15.8 a ni.

Mahse, Brazilian defender hian London club-ah hian beisei a phak lo a, a season hmasa berah hian vawi 26 chiah inlanin Chelsea defender rinrawl a ni pha lo.

Blues ho hian kum 29-a upa defender thlaktu tur hian Augsburg left-back Abdul Baba Rahman chu an be mek nia sawi a ni a, Ghanaian defender hi kum 21 chauha upa a ni.

Atletico sporting director Jose Luis Perez Caminero chuan, "Filipe Luis hi kan player hriatsa vek a ni a, khawvela left-back ṭha ber pawl kan neih tak avangin kan ṭha lehzual sawt ang. Kan club leh kan khelhdan te hrechiang sa vek anih avangin buaina a nei lo ang," a ti.

Madrid khaw club hian nikuma Liverpool lama loan-a an kal chhuah tir defender Javier Manquillo chu French club Marseille lamah loan bawkin an chhuah tir.