Renault-in hma an sawn

Formula one team Red Bull car engine siam tu company Renault chu an ṭha tawk tawh lo tiin nasa takin sawisel ni mah se Hungarian Grand Prix-ah an la ṭha tawk a ni tih an lan tir. Red Bull driver Daniil Kvyat chu pahnihna a nih bakah a teammate Daniel Ricciardo chu pathumna a ni bawk.

Red Bull hian kum 2010 aṭanga 2013 chhung khan Formula 1 inel­naah ro an rel a, driver championship leh constructors champion­ship-ah tuma el rual lohin pakhatna an ni fai vek. Amaherawhchu, nikum aṭang khan Mercedes leh Ferrari ten hma rawn sawn chho lehin an el pha ta meuh lo.

Kuminah phei chuan Red Bull hian beisei an phak lo hle a, intlansiak vawi 10 awm tawh aṭangin Constructors' Cham­­pionship-ah point 96 chiah la hmuin palina an ni mek a, hmahruaitu Mercedes chuan point 386 an hmu tawh thung.

Hetiang boruak a nih avang hian Red Bull hian an car engine chu an chet ṭhat loh chhanah ngaiin Renault nena an inzawmna pawh tih tawp an rilruk hman. Red Bull team principal Christian Horner chuan an inkar a ṭhat loh thu leh contarct tih tawp hial an duh thu a lo sawi tawh nghe nghe. Mahse, intlansiak hnuhnung berah hmasawnna nasa tak an neih avangin an boruak pawh hian ṭhat lam a pan leh tura ngaih a ni.

Renault Sport boss Cyril Abiteboul chuan, "Renalult hi kum 100 chuang zet chu moto­sport-ah hian a lo tel tawh a, tawn hriat chu kan nei tam ve tawh hle. Infiamnaah chuan kan duh anga thil a kal theih loh chang a awm fo a, chutiang hunah chuan inhriatthiam tawnna neih a ṭul ṭhin. Hmasawn turin kan theihtawp kan chhuah reng a ni," tiin a sawi.

Tunah hian Renault hian Red Bull bakah Toro Rosso car engine an siam mek a, season tharah Red Bull hian car engine dang an hmang a nih chuan Renault sumdawnna hi a tlak hniam phah ngei ang.