Red Devils zingah Angel a láng

British club-in player a lakluh zinga manto ber Angel di Maria chu Premier League-a kum khat lek a khelh hnuah Manchester United chhuahsana Paris St-Germain zawm mai tura sawi a ni.

Argentine winger hian United tan kum nga daih contract a ziak a, kum li dang contract a la neih miau avangin US Tour-naa United manager Louis van Gaal-a'n 'cham zel se ka duh' tih a sawi kha chu ṭawngkam ṭha satliah niin a lang. Dutch manager hian kum li chhung contract nei chungah hian thuneihna a nei a ni.

A dik thlup

Pound maktaduai 59.7 man Di Maria hian 26 August, 2014 khan British player manto ber ni turin contract a ziak a. A hlawh hi kar khatah £200,000 chuang hret niin Premier League emaw Champions League emaw a United a champion pui chuan bonus a dawng dawn a, Ballon d'Or chawimawina a dawn pawhin bonus a dawng thei bawk.

Real Madrid-in an duh tawk loh vanga United-in Di Maria an la lut thei tih chu a chiang a, amaherawhchu Champions League final-a man of the match a nih avangin Real-in an duh loh chhan hi mi thar (2014 World Cup top scorer James Rodriguez) an lawm vangah a ngaih theih bawk.

2014 World Cup-ah Di Maria-a'n an ram Argentina chu final-ah a hruai thleng a, David Moyes hnuaia lawmna tur nei lo United supporter-te'n an lawm vak pawh kha a mak lo a; an jersey no. thulkhung 7 an haktir nghal pawh kha thil inhmeh tak a ni.

A fuh zel

Mamawh chhana Di Maria-a'n United tana a game hmasa berah Burnley nen goal awm loin inhnehtawk mah se field chhungah a hmuhnawm fal a. 4-0 zeta QPR an hneh ṭuma goal leh assist an neih bawk avangin United tana a bul ṭan dan hi chhinchhiah tlak tak a ni.

Beiseina beidawng

Thilmak a thleng - match thumnaah United-in Robin van Persie leh Di Maria hmangin Leicester lakah goal an khung a. Tlar hnung phui lo United-in goal nga an chhuah a, 5-3 in a chak lo.

Media-in an ngaihven zawng an duh ang tawka an puan­chhuahna ram England a ni miau a, Di Maria khelh ṭhat lam aiin minute 90 chhung a khel ṭhin lo chuan sawi zui a hlawh a. October 5, 2014-a Everton an hneh ṭuma goal a khung hnuah January 4-a League One club Yeovil nen FA Cup third round-a an inhmachhawn ṭumin a pet goal leh chauh.

Argentine winger khelhṭhat lohna phenah chhan ṭha tak a awm. October thla hian Argentina-in an hmelma Brazil chu Beijing-a friendly match-ah 2-0 in an hneh a, khaw lum karah United winger hian minute 90 chhung a khel a. Ni thum hnua Hong Kong an tum ṭumin hun tawp hma minute 17 a khel bawk. Di Maria hian friendly match khel tur hian 20,000 km vel zet a zin a, nipui chawlh hmanga loa World Cup khel a nih bakah inhliam vanga final khel lo a nih bawk avangin Argentine winger hi a rim lutukah a ngaih theih.

Chu chauh chu a ni lo, United-in Van Gaal-a hnua kalphung thar an zawng a, khelh dan an thlak sek bawk. United tana Di Mara match hmasa 16-ah position parukah a khel a, central midfield leh striker position thlenga dah a ni.

Player tan khelhna hmun thlak a harsa a, an harsatna ber ṭhin chu ṭawng leh awmna hmun a ni. Di Maria a bang bik lo - ṭawng lama an harsatna belhchhah turin Cheshire-a an chenna in chu January thla tawp khan rukruin rawk an tum a, hlawhtling lo mah se a nupui Jorgelina Cardoso leh a fanuah nghawng lian tak a nei a. In pangngai chhuahsanin khawpui chhunga hotelah pindan an la a, chhungkaw chenna atan chuan a fuh tawk lo.

Field chhungah Di Maria a talbuai zel a, FA Cup quarter­final-a Arsenal an hneh loh ṭumin hnawhchhuah a ni a, a let leh hnuah match ruk a zawnin thlak a ni bawk. Premier League match hnuhnung bera Hull an hmachhawn ṭumin starting eleven chang mah se minute 23 lekah malpui hliam vangin thlak a ni. Premier League-ah United palinaah an awm a, Di Maria hian vawi 27 chauh khelin goal thum lek a khung. Season khatnaah Di Maria laka United supporter-te beiseina a thamral.

Chhuah an phal

Di Maria hi United enkawl danah a lungawi lo a, chhuah a duh. Manager Van Gaal hi player lungawi lo kawl zui thei loa ngaih a ni bawk. United-in lak an tum laia awih ve ngawih ngawihtu PSG-in chhuahna remchang an siam a, US Tour-a kal ve (duh) lo Di Maria tan chuan hun ṭhaah a ngaih theih.

Tarlan danin PSG lam hian pound maktaduai 46.05-in Di Maria hi an leichhuak ngam a, kum khat chhunga pawisa hlutna inthlak danglam dante thlir tel chuan United pawisa chan zat tur hi pound maktaduai 10 a tling lo.

Di Maria hian talent nei ṭha mah se season khatnaah Pre­mier League player of the year Eden Hazard nen an inkhelh tam hleih hle. Chelsea winger hian minute 3372 a khelh laiin Di Maria hian minute 1642 chauh a khelh a, Belgian winger (goal 14) hi goal khung lamah pawh Di Maria (goal 3) hian a pha lo hle. Amaherawhchu Di Maria hi tlem daih mah se assist lamah erawh a elpha, Real Madrid player hlui hian assist vawi 10 a nei a, Hazard (assist 9) aiin a ngah hret.

Kum 27-a upa Di Maria talent hai rual a ni lo a, kum khat hnu leka an chhuahtir a nih chuan Sir Alex Ferguson-a hun lai angin United-in dawhtheihna an nei tawh lo tih a nemnghet anga, Van Gaal-a hnuaiah team ṭha zawk din an tum zelah a ngaih theih bawk ang.