Atletico de Kolkata-ah Helder Postiga a lut

Portugal international Hel­der Postiga chuan nimin khan Indian Super League club Atletico de Kolkata chu mar­quee player ni turin a zawm.

Season hman zawh takah khan Postiga hian La Liga-ah Deportivo La Coruna tan a khel a, vawi 14 a inlanah goal khat chiah a khung a ni.

Kum 32-a upa striker hian Europe-a club lian tak tak Valencia, Lazio, Real Zaragoza, Sporting CP, Tottenham leh Porto tana lo khel tawh ṭhin a, Portugal tan vawi 71 a inlanah goal 27 a khung tawh bawk.

India cricketer ropui chawl ta Sourav Ganguly-a te club hi kar hmasa lawk khan Chelsea striker hlui Didier Drogba nen sawizawm an ni a, hming langsar tak tak zingah Claudio Pizarro, Roman Pavyluchenko leh Tuncay Sanli te hming lam rik a ni bawk. Mahse, Postiga hian ISL season hmasa bera ATK champion puitu coach Antonio Habas mit a la ta ber niin an sawi.

Valencia boss hlui Habas chuan, "Postiga kan la lut thei hi ka lawm hle. Indian player leh international player-te pawhin a hnen aṭang hian zir tur tam tak an nei dawn a, season thar atan kan team-in kan ṭhatpui ngei ka beisei tlat a ni," a ti.

Postiga hian football khaw­­velah tawnhriat a ngah tawh hle a, kum 2002-03 season-a Porto-in Jose Mourinho hnuaia UEFA Cup, Portuguese league leh Cup nomawi an chawi ṭum khan vawi 47 inlanah goal 18 khungin an player pawimawh ber pawla mi a ni nghe nghe.