Valdes a la hlim reng

Manchester United manager Louis van Gaal chuan Spanish keeper Vic­­tor Valdes chu a thu zawm loa puh­in club dang zawm turin a hrilh. Amaherawhchu Barcelona keeper hian United chhuahsan mai a la tum lo, ngawrh takin training a la nei chhunzawm zel.

Kum 33-a upa Valdes chuan, "Ka hlim a, ka chak ṭha a. Training ṭha taka ka neih theih avangin ka lawm hle. Min awmpui Pathian chungah ka lawm takzet a ni," tiin twitter-ah a ziak.

Valdes hi Dutch manager Van Gaal-a'n reserve team tana khelh duh lo angin a sawi a, amaherawhchu Spanish keeper hian nikum khan United Under 21 tan match thum a khel lawi si. United manager-in Sampdoria aṭangin free transfer-in Sergio Romero a la lut a, Argentina goalkeeper hian US tour-ah team training a zawm tawh. First keeper David de Gea leh Real Madrid an sawi zawm zel bawk a, United keeper buaina chinfel theih a la ni lo.

Manchester United hian tukin zing dar 6:30 hian PSG an hmachhawn a, inkhel hi Star Sports 4-ah live a ni.