Mourinho-a'n Inter tichhetu ah Benitez-a puh
Chelsea manager Jose Mourinho chuan Real Madrid manager thar Rafael Benitez chu Inter Milan tichhetu ah a puh.
Mourinho-a'n Benitez chungchang hetianga a sawi chhan hi Liverpool manager hlui nupuiin a pasal chuan Mourinho-a kih hnawk sa thenfai hna a thawk zel nia a sawi vang a ni.
Kum 52-a upa Mourinho chuan, "He hmeichhia hian thil a hrechiang lo a ni. A pasal hian Chelsea-ah khan Roberto Di Matteo a thlak a, Real Madrid-ah Carlo Ancelotti a thlak bawk. A pasalin min thlakna club awmchhun chu Inter Milan chiah kha a ni a, thla ruk chhungin a hunlaia Europe team ṭha ber kha a tichhe vek a ni," tiin Benitez a kap.
Mourinho hian kum 2009-10 khan Inter Milan chu treble champion a nih pui a, Italian club hi enkawl chhunzawm loin Real Madrid lam a pansan. Serie A club hian beiseina sang tak nen Benitez hi Mourinho thlak turin an la lut a, Italian Supercoppa leh FIFA World Club Cup-ah champion pui mah se beisei a phak chhunzawm lo a, thla ruk hnuah Serie A a pasarihna dinhmun an hauh mek laiin ban a ni.
Portuguese manager kam tam vek tak hian a duhtawk mai lo, Benitez-a nupui Montserrat Seara chu fiamthu a kap chhunzawmin, "A pasal ei leh in chungchang ngaihtuah sak sela chuan ka chungchang sawina hun a nei lo ang," tiin dul kiar ve tak Benitez-a tan ngeiawm takin a ṭawng.
Manager pahnih ṭawngkam
Mourinho-a'n Benitez chungchang a sawina
"Inter-a hlawhtlinna ropui tak ka pek avang khan lawmthu min hrilh a ba a ni. Fan-te hnenah kan pahnih chungchanga an ngaihdan chu zawt mai ru"
Benitez-a'n Mourinho chungchang a sawina
"Liverpool-in Chelsea hneh kan chin hma kha chuan Jose Mourinho nen hian ṭhian ṭha tak kan ni ṭhin. Liverpool min ngam loh tak em hnuah khan a rilru a thlak ta mai mai zawk a ni"