Vawiin aṭangin Lammualah I Day Football Chanmari Vs Police; BVT Vs Dinthar

Tualchhung football club-te tana knockout inel­na hlu ber Independence Day Celebration Football Tournament chu vawiin hian Lammualah khelh ṭan a ni dawn.

Tlai dar 3:00-ah cham­pion lai Dinthar FC leh transfer laia thawm nei lian Bethlehem Vengthlang FC an inkhel ang a, hemi hma hian 2013 champion Chanmari FC leh 2012 champion Mizoram Police te chhun dar 12:30-ah an inkhel bawk ang.

Chanmari vs Police

Tun hma chuan Mizo­ram Police hi team dang tan tehfung an ni a, chhiat lai an neih ve loh vang a ni. Amaherawhchu an player pawimawh striker F. Lalrinpuia leh winger Lalbiakhlua te an elpui Aizawl FC loan hmanga an hawhtir avang leh inkhelh thiam vanga Police-a lut an upat ṭan avangin team ṭha tehna an ni tawh lo.

Chanmari FC erawh coach H. Vanlalthlanga awm tawh lo mah se a thlaktu HC Zarzoliana hi tualchhung football-a nomawi chawi thei coach a ni a, record ṭha tak nena Dinthar FC chhuahsan a ni.

2013 I Day champion Chanmari hian MPL3-a goal kaw khungtu Malsawmfela thlawp turin a nau Lalnunmawia, Johny Lalfakzuala leh MPL1 best player R. Laldanmawia te Dinthar FC aṭangin an a lut a; Aizawl FC aṭangin Lalrozama an la lut bawk.

Chanmari hi team ṭha zawk ni mah se midfielder Rochhingpuia leh coach Zara ten D Licence Course an chhim avangin season thar ṭanna inkhelah an tel thei dawn lo.

BVT FC Vs Dinthar

Bethlehem Vengthlangin team thar din turin Lalsangzuala Hmar an la lut a, Sanga hi MPL ṭantirh aṭanga Chanmari FC coaching staff a awm a ni.

BVT-in transfer laiin MPL3-a Chanmari attacking trio Laldingngheta, Lalruatfela Zote leh MS Dawngliana te an la lut a, an kawl sa player nen MPL4 ṭan hmaa ngaihven hlawh an ni.

Dinthar FC erawhin an player pahnih Lalmuansanga leh KC Lalchhuanmawia te chiah an chelh a, a bak zawng an chhuahtir. Chutihrualin Dinthar hi dah hniam theih an ni lo, tawnhriat nei ṭha head coach T. Vanlalhluna'n thiam takin player a la lut tih hriat a ṭha.

I Day Football inkhel en man hi Rs 30 a ni a, tualchhung football ngaina tan inkhel en tur a awm leh ta.