Rafael Nadal A chak nghal

Thawhlehni khan Germany ramah Hamburg Open khelh ṭan a ni a, seeded pakhatna Rafael Nadal chuan a match hmasa berah Fernando Verdasco a hneh.

World number 10 Nadal hian first round hi awlsam takin a paltlang lo a, set hmasa ber a hloh hnuin a hnampuipa Verdasco chu 3-6, 6-1, 6-1 in a hneh.

Nadal hian Wimbledon second round-a Dustin Brown a hneh loh hnua a game hmasa ber a khel a, clay court a inkhel ni mah se set hmasa berah erawh beisei phak loin a service a hum zo lo nghal.

Mahse 'king of clay' tia hming lem an vuah sak hian set hnuhnung pahnihah erawh a theihna pho chhuakin game khat ve ve chiah a hloh. French Open quarterfinal-a world number 1 Novak Djokovic a hneh loh hnuah Nadal tan he inkhel hi clay court-a a inkhelh lehna hmasa ber a ni.

Kum 29-a upa Nadal chuan, "Duhthu­samin bul ṭan fuh lo mah ila a tawp erawh ka khar ṭha hle chuan ka hria. Ka taksa a hrisel ṭhat avangin inkhel thlak danglam turin huaisen takin ka bei let thei a ni," tiin a sawi. Grand Slam vawi 14 champion tawh Nadal hi Hamburg Open-ah hian kum 2008 khan a lo champion tawh bawk.

Inkhel dangah seeded pahnihna Tommy Robredo chuan a match hmasa berah Alexander Zverev chu 6-7, 6-4, 6-2 in a hneh ve bawk. Seeded pahtumna Roberto Bautista Agut, seeded palina Andreas Seppi leh seeded parukna Juan Monaco te paw'n second round an inhlangkai bawk.