Thlanga hnuaiah free coaching

August 17, 2015 aṭang khian Santosh Trophy-a Mizo­ram champion puitu coach H. Vanlalthlanga kaihhruaina hnuaiah Sports & Youth Ser­vices Department chuan 'non residential free football coa­ching' a buatsaih dawn.

Chief minister, sports mi­nis­ter leh SYS director hmalakna zarah kum 14 chin chunglamten a thlawnin football coaching an dawng thei dawn a. August 17 - December, 2015 chhungin Rajiv Gandhi Stadium, Mualpuiah coaching hi neih tur a ni.

Free coaching hi mipa leh hmeichhe tan a chhim theih a, hmeichhe tan coaching hi kumin Subroto Cup International Foot­ball Tournament-a Mizoram aiawh tel tur thlanna a ni nghal ang.

Coaching-a tel duh tan Sports Office-ah (MANTA BA­ZAR Saron veng opposite) July 31

aṭangin enrolment form Rs 10-in a lak theih a, form hi August 14 hma ngeia office-a thehluh leh tur a ni a, a thehlut hmasa duhsak a ni ang.

Veteran coach Thlanga hian MPL club a enkawl hmain SYS FC chu hlawhtling takin a enkawl a, kum 2013 khan Chanmari FC enkawl ṭanin MPL2, 2013 MFA Cup leh 2013 I Day Football-ah a champion pui a, MFA Super Cup-ah vawi hnih a champion pui bawk.

Mizo footballer ṭha tam tham tak chher chhuaktu Thlanga hian kum 2014 khan Santosh Trophy leh Dr T.Ao Memorial Northeast Football Tournament-ah Mizoram a champion pui bawk.