Vidal-a'n Bayern Munich a zawm ta
Juventus midfielder Arturo Vidal chuan kum li chhung cham turin German champion Bayern Munich a pan ta.
Allianz Arena lam hian Chilean midfielder mana an thehchhuah zat hi tarlang chiah lo mah se, khawthlang media ṭhenkhat chuan Bayern hian pound maktaduai 26 bakah a khelh
ṭhat dan a zira pek belh turin Juventus chu an inrempui niin an sawi.
Vidal-a beisei Champions League
Kum 28-a upa Vidal chuan Bayern a pan chhan sawiin, "Player ka nih anga hmasawn zel ka duh a, Champions League nomawi chawi ka duh a ni. Ka beiseina leh duhthusam te ka tih hlawhtlin theihna tur hmun remchang ber chu Bayern hi niin ka hria," a ti.
Season hman zawh takah khan Vidal hian Juventus a chet ṭhatpui hle a, Champions League final thlenpuiin Barcelona an hneh lo. Heti chung hian Serie A leh Coppa Italia-ah erawh an champion tho a, treble champion an ni teuh hle.
Juventus-a a tih theih loh hi Vidal chuan Bayern-ah a tih theih a inbeisei a, kumin Copa America-a Chile champion puitu chuan, "Season hmasa khan champion nomawi pathum kan chawi teuh em em a, Bayern-ah hei hi kan hlawhtlinpui theih ka beisei. Treble champion nih hi Bayern-in kan tum ber tur chu a ni," tiin a ṭawng pawr hle.
Hmanah chuan...
Kum 2011-a Bayer Leverkusen aṭanga Vidal-a'n Juventus a pan dawn khan Bayern pawh hi Vidal duhtu langsar zingah an tel a, mah se Chilean midfielder hian Juventus pan a thlang zawk.
Hemi ṭum hian Bayern CEO Karl-Heinz Rummenigge chuan Vidal hi a sawisel nia report a ni a, tunah erawh an thawk dun dawn ta. Vidal chuan thawnthu hlui hi sawi chhuakin, "Khatih hunlai a Juventus ka thlan chhan chu ṭawng lama ka buaina leh ka chhungkua vang a ni. Tunah chuan nasa takin hma ka sawn tawh a, Bayern kawr ha turin ka inpeih tawh a ni," a ti.
Bayern an phur
German champion sporting executive Matthias Sammer chuan, "Kum li chhung a zawna Bundesliga champion nih kan duh a, chumi ti tur chuan Vidal hian min pui thei ang. Player ṭha tak, goal khung pawh harsat lo leh chak ṭha tak a ni a, kan ṭangkaipui ang," tiin season li Juventus-a a cham chhunga Serie A title vawi li chawi thei Vidal chungchang a sawi.
Tun hnaiah Bayern-in player thar an la lut nual a, Shakhtar Donetsk aṭangin midfielder Douglas Costa leh Stuttgart aṭangin goalkeeper Sven Ulreich leh midfielder Joshua Kimmich te an la lut tawh a ni.