Mourinho-a'n Ranieri a mikhual dawn Man United Vs Leicester City

Chelsea boss hlui pahnih Jose Mourinho leh Claudio Ranieri ten tun hma aṭangin chanchin an lo nei tawh ṭhin a, ualau taka lo inbauh tawh ṭhin manager pahnih hi vawiin tlai dar 5:00-ah an inhmachhawn dawn.

'The Special One' inti ngat chunga khawvel hmelhriat tura inphochhuak Mourinho-a'n kum 2004 khan Chelsea-ah Claudio Ranieri a thlak a, a thlak tak manager hi 'mi hlawhchham' tiin a sawisel zui.

Blues-in an ban hnuah Mourinho-a'n Serie A lamah Inter Milan zawmin kum thum a cham a, hetih chhung hian Ranieri-a'n Juventus leh Roma a enkawl thung. Portuguese manager-in Italy-ah meuh pawh Italian pachal hi a dim lo, "nomawi chawi turin a rilru ngaihtuhnain a tlin lo," tiin a sawisel!

Hetih hunlai hian Mourin-ho hian Inter Milan chu treble champion a nihpui a, Ranieri erawh nomawi uanpui tur nei loin a awm. Vawiinah erawh engkim thlak danglamin a awm. Portuguese manager hi Champions League khel phak lo Manchester United coach a ni a, Claudio Ranieri erawh Premier League champion Lei-cester City coach a ni thung.

Thawnthu hlui

Italian manager Ranieri-a tan tun hi ṭawng pawr hun ni mah se media leh fan-te lawm rawn hlawh manager hi Mourinho lakah a uang duh lo. Kum 64-a upa manager chuan, "Mourinho nena kan inhmuhthiam lohna kha chu hun rei tak a ni tawh a, tunah chuan engkim theihnghilh a ni tawh. Uaiin thlum tui tak in tura min sawm a nih ngat chuan a inah ka kal em em ang," a ti.

Ranieri-a'n Portuguese manager nena an inkarah buaina a awm loh thu sawi mah se manager pahnih thawnthu hlui enin Foxes boss hian Old Trafford-ah hnehna chan ngei a duh dawn tih a chiang. Italian manager chuan, "Tumah hlauh kan nei lo a, Old Trafford hi ka hlauhna chhan tur ka hre lo. Mipui 70,000 velin kan inkhel an en dawn a, hetiang taka boruak sanga inkhelh hi a nuam a ni," tiin Old Trafford boruak vanga an buai loh tur thu a sawi.

Mourinho a pawr!

Manchester United-in match thum chhung a zawna chak hmel an hmuh loh hnuah League One club Northampton Town hnehin hnehna an chang a, Mourinho a la ṭawng pawr hle! Real Madrid boss hlui chuan, "Kar duhawm lo tak kan hmang tih ka hai lo a, mah se football mifing kan tam mah mah chuan ka hria," tiin amah sawiseltute a chhanglet.

Kum 53-a upa manager chuan, "Match thum kan tlawmna hmang khan kum 16 chhunga ka hnathawh ropui takte thai chhiat an tum a, awihawm loh khawpa Manchester United chanchin ropui tak hi thleng lo ang maia sawi an tum a ni. Kar hmasa kan result vangin fan-te an hnual ang tih ka hria a, mah se vawiinah erawh he team hi min ṭawiawm leh ang tih ka chiang a ni," tiin fan-te puihna nen hnehna chan theih a inbeisei.

Hliam ngah United

Tun dinhmunah Man-ches-ter United doctor ten hnathawh tur an ngah hle! Luke Shaw, Henrikh Mkhitaryan leh Anthony Martial te chu vawiin tlaia inkhel tura an dam hman dawn leh dawn loh a la chiang lo a, defender Phil Jones chu inlan thei lo tur chiangsa a ni.

Leicester City-in hliam vangin goalkeeper Kasper Schmeichel leh defensive midfielder Nampalys Mendy an la chhawr theih hmel loh a, hrem vangin defender Marcin Wasilewsk chu khel lo tur chiang sa a ni.

Sulhnu

United-in an league match hmasa pathuma hnehna an chan vek hnuin Manchester Derby-ah an tlawm a, an chet chhiat inṭanna a ni. Europa League-ah Feyenoord hneh loh chhunzawmin Watford khelmualah 3-1 ngawtin an mualpho bawk.

Leicester City dinhmun hriatthiam a har hle. Liverpool laka 4-1 a an tlawm hnuah Club Brugge leh Burnley lakah 3-0 ve vein an chak a, Chelsea lakah 2-4 in an tlawm leh tawh thung. United tana ngaihṭhatna tur erawh FA Community Shield-a an inhmachhawn
ṭumin Foxes hi 2-1 in an hneh.

Hei erawh theihnghilh loh a ṭha - Leicester tan an club player manto ber Islam Slimani a khel thei tawh a, Algerian striker hian a match hmasa berah goal hnih a khung nghal!