Hammers tan insiamṭhat hun

Season hmasaa khel ṭha tak West Ham-in tun season-ah beisei an phak lo a, league match nga an khelh tawhah vawi li tlawmin vawi khat chiah an la chak! An league match hnuhnung bera Watford an hneh loh ṭumin manager Slaven Bilic chuan, "Buai-na kan nei a, inchinfel kan ngai. Manager ka ni a, a bul ṭanna tur chu keimah hi ka ni," tiin mawh a phur thu a sawi.

Hammers-in EFL Cup-ah League Two club Accrington Stanley an mikhual a, Bilic-a'n an tan insiamṭhatna remchang niin sawi mah se injury time-a Dimitri Payet free kick hmangin hnehna an chang thei hram.

Croatian manager Bilic-a'n, "Ka lungawi lo takzet. Goal khung tura injury time kan nghah a ngai hi ka hrethiam thei lo," tiin a sawi a, a lungawi lohna hi a awm lo hran lo. Pathianni zan dar 8:30-ah match thum chhung goal chhuah miah loa a zawna chak tawh Southampton an mikhual dawn a, Accrington laka insiamṭha lo Hammers hna a hautak dawn.