Hull laka thinrim duh Jurgen Klopp

Tun hnaia goal khung harsatna nei lo Liverpool-in zanin dar 7:30-ah Hull City an mikhual dawn a, Liverpool manager Jurgen Klopp chuan a player-te chu thinrim rilru pu chunga khel tura a duh thu a sawi!

German coach Klopp chuan, "Eng team pawh hmachhawn dawn ila kan rilru put ngai reng put ka duh a, team hneh awlsam bik an awm lo. Football-ah chuan kawng engkima a chungnung zawk nih duhin kan duham tur a ni a, kan rilru puthmang pawh a pa em em tur a ni," a ti.

Klopp chuan sawi chhunzawmin, "Ka player-te hian an rilru a thinrimna rilru pai chungin khel se ka duh. Hull City hian kan point min chhuhsak tumin an khel dawn a, kan chunga thil ṭha lo tih tumte lakah chuan kan thinrim em em tur a ni," tiin a naute a fuih thiam hle.

Liverpool-in tun season-a inelna hrang hranga match sarih an khelh tawhah goal 19 an khung tawh a, tlarhma lamah harsatna an nei lo tih a chian avangin Hull tan Anfield-a fimkhur a fin thlakin a rinawm.

Klopp-a'n EFL Cup lama Derby 3-0 a an sawp ṭumin Mainz aṭanga a lakluh goalkeeper Loris Karius chu inkhel bul a ṭantir a, regular number one Simon Mignolet chu bench lamah hun hman tir a ni thung. Klopp-a'n season tira hliam vanga a chhawr theih loh Karius hian Belgian keeper hi a nek chhuak mai dawn em ni? tih chu zawhna awm a ni.

Kum 49-a upa manager chuan, "Tu zawkin nge Hull lakah bul ṭan dawn ka sawi thei lo a, player pawimawh zawk sawina hun a ni lo. Player ka thlan reng rengin an tana ṭha tur berin thutlukna ka siam ṭhin," tiin engmah a sawi lawk duh lo.