Leganes zinkawng ngaihnawm chu

Hmanni lawka Barcelona-in 5-1 a an sawp Leganes chanchin hi i lo hre tawh ngai em? Barcelona sawp hnu nih hi tunlai khawvelah thil zahthlak a ni lo a, Lionel Messi, Luis Suarez leh Neymar te mikhual theitu nih hi kum thum liam taa third division-a la inlan club tan phei chuan inchhuanna tham a ni - chu chu a ni Leganes chanchin chu!

Khawvela club ropui ber pawl pahnih Real Madrid leh Atletico Madrid te innghahna Madrid khawpui aṭanga kilometer 11-a hlaah khawpui pakhat a awm a, a hming chu Leganes a ni. Mipui 185,000 lek chenna khawpui hian kum 1928 khan an khaw hming chawiin club an din a, kumin hi an club kum 88 tlin hnua La Liga an khelh hmasak ber a ni.

Hmanah chuan...

Season thum liam taah kha chuan Leganes hian Spanish Segunda division B-ah an la khel a, Spain rama club football inelnaah chuan third division a ni. Hetih hunlai hian Leganes hian training ground pawh a hranpain an la nei lo a, an khelmual a chhiat avangin ruahsur laiin tui a tling nasa thei hle!

Third division-a kum sawm an khelh hnuah Segunda division-ah an inhlangkai a, an season hmasa berah 10-na nichungin season an khar. Kum 2014-15 season ṭan dawn khan Leganes fan-ten La Liga khelh lam chu an la ngaihtuah phak lo mai thei. Mahse, second division-ah takngial pawh budget tlem pawl club hian an beisei phak baka ṭhain second division-a an season hnihnaah an khel tlat!

Mipui 8,000 vel lek lenna stadium neitu club hian Mirandes an hneh hnuah an elpui Alaves-in Gimnastic an inhnehtawkpui bawk avangin La Liga khel turin an tling chiang a, mipui nuai hnih pawh tling lo awmna khawpui chu a sukin a su dup dup a ni ber.

Fak tlak Garitano

Vawiina Leganes chanchin ngaihnawm kan hriat theih chhan hi kum 46-a upa manager Asier Garitano vang a ni. Player a nih laia Spain youth team tan pawha lo inlan ve tawh manager hian kum 2013 khan Leganes hi a zawm a, thawnthu ropui a ziahpui dawn tih a inhre bik kher lo ang.

Garitano chuan an hun tawn thlirkirin, "Leganes ka zawm tirh khan player pasarih chiah kan nei a, chung zinga player pathum chu ka duh zawng an la ni lo zui," tiin a hun hmasa lam a sawi chhuak a, engmah lo aṭangin vawiina La Liga club hi a khai chhuak a ni ber.

Player a nih lai pawha first division khel miah lo manager chuan sawi chhunzawmin, "Zep loah chuan first division khelh phak kan inbeisei lo a, second division-a inhamtan hram dan ngaihtuah kha kan tih theih chu a ni," tiin an dinhmun a sawi.

Garitano sawi ang ngeiin second division-a an season hnihna match hmasa 12-ah Leganes-in vawi hnih chiah hnehna an chang a, mah se huaisen taka an beihlet miau avangin an hawikir tawh lo.

Thu ropui chu

Leganes-in La Liga an khelh theihna kawnga pawi­mawh ber chu an infuihna ṭawngkam a ni. An match hnuhnung bera Mirandes an hmachhawn dawnin an chak chuan La Liga an khel thei dawn tih an hria a, dressing rooom kilah captain Martín Mantovani chuan player-te a ko khawm.

Argentine defender hian,"Vawiinah hian kan thinlung chuan thuruk ril tak min hrilh a ni. Hnehna kan chang zo ta lo a nih pawhin player ṭha tak i ni reng dawn a, kan chak a nih erawh chuan i chanchin hi thaireh a ni tawh ngai lo ang," tiin player-te a fuih a, hnehna an chang.

Leganes hian an dressing room-ah thu danglam tak inziak an tarlang bawk a, "He hmunah hian i ṭhu a nih chuan thil ropui tak tih i duh vang a ni ngei ang," tiin - an thuchah ropui tak te hian Leganes hi hei leh chen hi an hruai tih loh rual a ni lo.

Hello La Liga!

Kum 2016 nipui a lo herchhuak a, a kum hmasa lawka club pumpui budget pound maktaduai 3 vel chiah neitu khan La Liga an khel dawn - an thawnthu erawh danglam lo a awm a, chu chu second division-a budget hniam ber an ni ang bawkin La Liga-ah pawh budget hniam ber tho an ni!

Leganes-in La Liga-a an match hmasa ber chu Celta Vigo-ah khelin 1-0 in hnehna an chang nghal a, an mual Butarque-a an match hmasa berah Champions League finalist Atletico Madrid an mikhual. Leganes hi an zam dawn emaw an ti a, mah se a vawi khat nana La Liga khel tur club phurna hi an zamna aiin a nasa zawk.

Khelmual chu club jersey rawng a pawl hlirin a khat a, scarf, flag leh banner chu hmun tinah hmuh tur a awm. 'Butarque hi Leganes tan chauh a ni' tih te, 'Inchhuang takin' tih te, 'Mang ram ata harh loin kal zel ila' tihte chu a intar chuai a, La Liga an kai chuan a sam a tih pawl tur thu puangtu captain Martin Mantovani-an sam pawl pu chunga khelmuala hma a rawn hruai meuh chuan thawm a ṭha kher mai. Minute 90 a zo a, team pahnih 0-0 in an inhnehtawk.

Leganes player te an taima a, Spanish chanchinbu lar AS chuan, "He club-ah chuan an ticket hralhtu thlengin club tan an theihtawp an chhuah a ni," tiin a ziak a, Leganes mipui ṭanrualna a fak.

Khawpui danglam

Leganes khawpui hian danglamna maktak a neih chu an khaw mipuite an inlungrual em em hi a ni. Rimawi an ngaina a, an khaw chhungah rock band lar AC/DC leh Scorpions hming chawia an phuah veng hming a awm hial!

Fanghma an thar nasa a, an larpui ber pakhat a ni. Atletico Madrid an mikhual ṭum khan Leganes hian an mikhual laka an hawihhawmna lantir nan Atletico dressing room-ah bucket khat fanghma an lo dah!