Goal ruk leh tihsual paruk! Dinthar lawm a kim lo, Chhinga Veng an lawm lo

Mizoram Premier League Season 5-ah Chhinga Veng-in an goalkeeper chetsual vangin match zawnin point an hloh a, Dinthar goalkeeper chetsual vangin MPL kaithar hian point khat erawh an hlawh chhuak tho.

Ningani zan Lammual inkhelah Dinthar FC leh Chhinga Veng FC-te 3-3 in an inhnehtawk a, table mawngphaha awm laka hnehna an chan theih loh avangin MPL kai thar coach Lalremtluanga'n Vanglaini palai hnehah a hna a bansan tur thu a sawi. Thawhṭanni zan hian Chhinga Veng FC-in anmahni ang bawka result ṭha nei lo Aizawl FC an hmachhawn dawn.

Keeper tihsual 3

MPL atana Chhinga Veng FC lakluh keeper pahnih R. Lalhmangaihzuala leh Vannun-mawia-te chu Chanmari FC laka an chetsual avangin chawlhtir an ni a, Dinthar FC hmachhawn turin MPL kai puitu keeper Vanlalawmpuia chu khelhtir a ni.

Amaherawhchu North Mual-cheng tlangval hian Chhinga Veng a chhan zo chuang lo a, Dinthar goal hmasa ber hi keeper AwP-a dinna dik tawk loh vanga lut a ni.

Chutihrualin keeper chauh mawhpuh theih a ni lo - Chhinga Veng defender ten concentration an hloh vang a ni thei a, a chhan bulpui ber erawh Lalruatpuia tlan chak vang leh finishing tawih vang a ni.

Chhinga Veng keeper-in en bik a hlawh zanah Dinthar kee-per Lalrinhlua a ropui bik lo. Durtlang tlangval Hlutea hian a bulah Chhinga Veng forward PC Vanlalhmangaihzuala a awm tih hre loin ball vawm sawh a tum a, Khawzawl Vengthar tlangval PC-a'n ball chu pet perin si phurh sut nan a hmang zui bawk.

First half tawp hma hretin Dinthar defender Saihmingthanga freekick pet chu Chhinga Veng keeper AwP-a'n man perin goal khung thiam Michael Lalremruata tan goal-a chantir a harsa tawh lo. Dinthar ṭantute thawm a ring a, K. Kawla Stand-a awm Chhinga Veng ṭantute an reh ṭhap.

Hmuhnawm leh tihsual

Second half ṭan chiahah Chhinga Vengin tawnhriat ngah zawk Paul Ramfangzaua leh Lalkhawpuimawia te an luhtir a, inkhel a nung sawt.

MPL kaithar player-te an coach RT-a'n hna a chelh zel theih nan an tlan a ni ber a, Dinthar pawh coach thar Lalhlupuia tan an tlan ve bawk.

Game rang taka awmze neia khelh tum Dinthar player-te tawn-hriat neih tlemna a lang a, minute 53-naa an player pakhatin anmahni lama a tauh let chu Kelkang tlangval Mapuia'n striker ṭha bik a nih lantir nan chiang takin a khung. Dinthar luhai a reh mai lo a, box chhung
aṭanga defender ball clear tum pet sual chu Joseph Lalnunpuia zawnah kalin Chhinga Veng captain hian goal ropui a khung.

Chhingcows lamin au mai duh tawk loin halmawi leh halpuah nen Lammualah thawm an nei a, Dinthar ṭantuten ngawih an chuh thung.

Minute 80-naah halfway line aṭanga hla loah Dinthar FC-in freekick an hmu a, defender Saitea chuan Chhinga Veng goal-ah pet lut mawl tawpin keeper AwP-a mangchhia belhchhahtu a ni - a chhuah ho takzet!

Hun tawp thlengin inkhel rang leh hmuhnawm a awm zui a, goal mouth action tam mah se goal dang a luh belh tawh lo.

Keeper nge coach?

Chhinga Veng FC-in MPL ṭan hmain player ṭha tak tak an khawm a, coach Lalremtluanga pawh-in hetiang renga player ṭha hi ka la enkawl ngai lo tiin Vanglaini palai a hrilh tawh. Amaherawhchu MPL kaithar hi hliam vangin an buai a, Din-thar an khelh ṭum pawh hian MPL-a hming chher tawh MS Dawngliana, Ronald Zothanzama, H. Lalmuankima, Laldinliana leh Lalramliana-te chu squad-ah dah an ni lo.

Hei chauh hi a la ni lo, MPL-a tawnhriat nei tawh K. Lal-thlah-lova, Paul Ramfang-zauva, Lalchhan-chhuaha, Lalkhawpuimawia leh Dinthangpuia te chu dam chian loh vang nge ni bench-ah ṭhuttir an ni vek bawk.

Dinthar laka bul ṭan-tu Chhinga Veng player zingah Lal-ramfelpuia, Vanlalthanga leh Joseph te chiah MPL-a tawnhriat nei tawh an nih avangin sum hmang tam club tih an hriat loh.

Second half-ah Mapuia, Paul leh Chhantea te luhtir an ni leh tho a, coach Lalremtluanga'n a club hlui a hmachhawn ṭumin thutlukna a siam fuh tawk loah a ngaih theih bawk.

Engtin zel?

Chhinga Veng coach Lalrem-tluanga chuan, "Kan result avangin club leh veng mipui phurna zawng zawng a tlakhniam zel hmain ka ban mai hi a hunin ka hria. Club-in result ṭha beisei a, ka chunga dawhtheihna an lantir avangin ka lawm a, an beisei ang ka tihlawhtling thei lo erawh pawi ka ti. Club kal zelna turah duhsakna ka hlan," tiin Vanglaini palai a hrilh a, Dinthar coach hlui RT-a hian team chak lohna a siam ṭhat theih loh vanga bang a nih thu a sawi tel bawk.

Dinthar FC coach thar Lalnun-hlua chuan, "Bul kan ṭan chauh a ni a, insiamṭhatna tur kan ngah khawp mai. Keini chuan theihtawp chhuah zel tawp loh chu tih theih kan nei rih lo," tiin a sawi.

Dinthar Veng mipuiin an veng club leh an veng pa an ṭawiawm ṭha a, Lammualah Maimawms tam lo se chuan Chhinga Vengin hma an hruai hnuah MPL champion hmasa ber hi an tho leh tawh kher lo ang.

ZoFooty Statistics

Chhinga Veng FC 3 -3 Dinthar FC

CVFC : PC Vanlalhmangaihzuala 25'; Lalkhaw­puimawia 53'; Joseph Lalnunpuia 61'

DFC : Lalruatpuia 8'; Michael Lalremruata 43'; Saihmingthanga 80'

MoM : Isaac Lalremruata, CVFC

50% Ball Posession 44%

12 Shot(s) 8

6 On Target 5

2 Yellow Card(s) 3

0 Red Card(s) 0

Powered By Rainbow Multibrand

Mobile Showroom

Tute nge inlan?

Chhinga Veng FC (4-4-2) : Vanlalawmpuia; Lalthlamuana, Joseph Lalnunpuia, Vanlalthanga, Lalramfelpuia; H. Zoramthara (Lalkhaw­puimawia 46'), Vanlalhriata (Paul Ramfangzauva 46'), Isaac Lalremruata (Lalchhanchhuaha 79'), Lalsawmzela; PC Vanlalhmangaihzuala, Vanlallawma.

Dinthar FC (4-3-3) : Lalrinhlua; Stephen Lalnunmawia, Vanlalchhanhima, Lawmsangzuala, Saihmingthanga; R. Lalnunmawia, R. Lallawmawma (Chawngthansanga 90'), R. Lallawmkima (Joseph Lalṭhafela 62'); Samuel Laltlanthanga, Michael Lalremruata (Lalbiakzuala 51'), Lalruatpuia.