Messi tel loa inlan tur Barcelona
La Liga-ah chuan Barcelona leh Real Madird te hi hnehna chang nghal tura rinkai an ni ziah. Nilaini zan khan club lian pahnihte hi an chak zo lo ve ve. Zanin hian an inlan zui leh nghal dawn a, an khingpui tur tan hmachhawn an chakawm loh tawp ang le.
Champion lai Barcelona hi Atetico Madrid nen 1-1 a an inhnehtawk ṭumin Lionel Messi a inhliam a, an thiampuipa hi kar thum a chawlh a ngaih dawn avangin zanin dar 7:45-a Sporting Gijon nen an inhmachhawn hunah a inlan dawn lo.
A zawna league match 16-a hnehna an chan hnuah Real Madird hi Villarreal nen goal khat ve ve khungin an inhnehtawk. Pep Guardiola hoa Barcelona record lo siam tawh chu tluk mah se record thar an siam thei rih bik lo. Zinedine Zidane-a naute hian record thar siam an tum a nih chuan zanin dar 12:15-a Las Palmas an hmachhawn tur hi an bulṭan tharna a ni ang.
Khawvela hmatawng hlauhawm bera an sawi Lionel Messi, Luis Suarez leh Neymar (MSN) te inkawp leh Gareth Bale, Karim Benzema leh Cristiano Ronaldo (BBC) te inkawp hian a zawnin match 28 chhung zet goal an khung kaltluang tawh chu a tawp. Heng game 28-ah hian player tu emaw berin goal a khung ziah tihna a ni a, he record ropui tak hi Nilaini zan khan a rualin a tawp!
Enrique-a inringtawk
Luis Enrique chuan, "Messi inhliam hi kan tan hlohna a ni satliah lo a, football-in ani hi a chan a ni zawk," tiin a player duhlai chu Barca mai niloin khawvelin a a chan niin a sawi a, a dahsang takzet tih a chiang.
Spanish manager chuan sawi chhunzawmin, "Leo a tel hian team ṭha zawk kan ni a, tunah chuan a tel loa ṭha taka khelh kan tum a ṭul," a ti.
Barcelona hian Messi chhawr thei lo mah se an sulhnu thlirkir chuan zam tur an ni lo. An intawn hnuhnung 17-ah vawi 15 hnehna an chang a, ṭum hnih an inhnehtawk. Kum 1995 hnu lamah Sporting hian Catalan club hi an la hneh ngai lo. An inhmachhawn hnuhnung ber chu April kha niin Luis Suarez-a hattrick hmangin Barca 6-0 in an chak. Uruguay international lo mikhual hi a chakawm loh tawp ang.
Zidane-a Real Madrid
Player a nih laia Real fan-te atchilh rawn Zidane hian January thla aṭang khan senior team hi enkawl ṭan chauh mah se Champions League nomawi leh UEFA Super Cup a chawipui tawh a, manager ṭha zinga chhiar tel loh a harsa.
Season hmasa La Ligia-ah Barcelona an tluk lo a, tun season match nga an khelh tawh aṭanga point 13 hmuin hmahruaitu an ni mek. Khawvela player manto ber lo ni tawh Ronaldo leh Bale te an inhliam tih hre chungin nipui transfer lai khan player langsar an lalut lo a, kum danga an zia nen a inang lo hle.
Real hian Ronaldo leh Bale an chhawr thei tawh a, an match hnuhnung berah goal khung lo mah se an chesual nawnin a rinawm loh. Hetihlai hian defender Marcelo chuan hliam vangin Las Palmas hi a hmachhawn dawn lo a, tlarhnungah tawnhriat ngah Pepe erawh lo kir tura beisei a ni thung.
Atletico hre reng rawh
Barcelona leh Real Madrid te ropuina kan sawi ruala hmuh kan theih loh chu Atletico Madrid hi an ni. Diego Simeone-a naute hian kum 2013-14 season khan Spanish club ropui pahnih khumin league nomawi an chawi a, season liam ta pahnihah pawh team hnawksak an ni. Pathianni zan dar 7:45 hian Deportiva an lo mikhual dawn a, Inrinni zan inkhel result hre sa a an inkhelh dawn avangin chak duhna thinlung an nei lian lehzual ang.