A chung berah Chanmari FC
Chanmari FC-in Ramhlun North FC 3-1 a hnehin Mizoram Premier League-ah hma an hruai leh ta a; Lalsangzuala Hmar hoten I Day Football semifinal-a an hneh loh MPL kaithar lakah phuba an la.
Nimin tlai Lammuala inkhel-ah MPL kaithar Ramhlun North-in Zosangliana Sailo (Chhaia) hmangin minute rukna lekah hma hruai mah se second half-ah Chanmari FC-in Ṭhasiama, Isaac Lalruatpuia leh Vanlalbiaa Chhangte-te hmangin an chhang lêt. MPL2 champion thawh leh theihna tura player pawimawh Lalmuanzova chu man of the match-a thlan a ni.
An la tuai?
Ramhlun North-in Dinthar FC an hneh hnuah Bethlehem VT lakah point khat an hlawh chhuak a, Chanmari FC an hmachhawn hma hian hneh loh an la tawng lo. 2016 I Day Football best player Chhaia goal in a lantir chu Lalruatliana Sailo hoten inkhel bul an ṭan ṭha tih a ni a, amaherawhchu goal tam zawk an khung theihna hun ṭha erawh an hlah.
Royal Wahingdoh academy chhuak Jerry F. Zonunsanga'n Chanmari tlarhnung a paltlang vek hnuah hnai tak aṭangin a hlah a, hemi hnu hian Van-lal-thlamuana'n keeper MS Dawngliana chiah a hmachhawn hnuah goal-ah a chantir thei lo bawk. Chanmari FC-in awmze neiin goal an nawr thei lo a, Malsawmfela pawhin MPL kaithar tlarhnung inremkhawm chawp tan harsatna a siam thei lo.
Ramhlun North-in tlar-hnungah inhliam vang-in C. Ramdinmawia, Lal-ram-thlamuana leh Lalruatfela te an chhawr thei lo chungin Tawia nauten an khelh dan hmang an hriat chian avangin first half-ah an chungnung zawk. Amaherawhchu second half-ah Ramhlun North player-te ruhnona a lang a, goal thum lai an chhuah avangin point thum an hloh.
Champion zia?
Minute 45 chhung vanneih vanga beisei nei Chanmari FC-in halftime an hmang ṭha a, second half-ah erawh chak phu khawpin an khel ṭha. Minute 57-naah Ṭhasiama hmangin an si phurh an sut a, Chanmari goal luh nana Isaac leh midfielder Lalrinchhana-te thawh hlawk theih nan Ramhlun North tlarhnungin an hna an thawk lo.
Chanmari tan Muanzova a khelṭha a, Sawmfela kea ball a awm fuh chuan Ramhlun North tan buaina tur a awm zel bawk. Tawia hoten hmahruai theihna tur an nei leh a, minute 11 chiah khelh tur a awm tawh tihin vei lam aṭanga David Lalrinchhana cross ṭha tak chu Thlamuana'n a khawih fuh thei lo.
Goal awm tawh lo tura a ngaih theih hnuah Chanmari FC-in champion zia an chhuah a, Thomas Lalengkima cross Lalrinchhana'n a khawih pial hnuah Lunglei tlangval Isaac-a'n chiang takin a khung. Injury time-ah substitute Vanlalbiaa Chhangte-in dinglam aṭanga Muanzova cross chu goal-ah a chantir leh a, inkhel inhnehtawk tak ni siin Chanmari FC chu chiang takin an chak.
Eng nge an sawi?
Ramhlun North coach Lal-ruatliana Sailo (Tawia) chuan, "Kan tlarhnung player-te tawnhriat neih ṭhat tawk lohna a lang a, team ṭha zawk Chanmari FC an chak a ni. Point hloh pawizia kan hria a, chuvangin a rang lama tho chhuak leh vat turin ṭan kan la nghal ang," tiin Vanglaini palai a hrilh.
Chanmari FC coach Sanga chuan, "Khati taka kan che thei lo kha mak ka ti a, kan khel fuh lo takzet a,a tawpah kan vannei zawk a, first half-ah khan goal tam zawk chhuah thei kan ni," a ti. CFC manager Mawitea chuan, "A vannei zawkah kan ṭang a, point thum kan hlawh chhuak a ni. Kan khelh danah an lawm lo a, kan result-ah erawh kan lungawi," tiin inkhelah an chungnung bik lo tih a sawi.
Lalsangzuala Hmar hoten I Day Football leh MFA Super Cup-ah Ramhlun North leh Aizawl FC an hneh lo a, heng club pahnih hi MPL5-ah an hneh leh ve ve tawh avangin table-a hmahruaitu nih hi an phu.
Tute nge inlan?
Ramhlun North FC (4-4-2) : David Lalrinpuia; Israel Laldingngheta (Jerry Lalrinzuala 62'), Lalmalsawma, Lalmuanawma, Henry Lalhruaitluanga (Malsawmtluanga 65'); Jerry F. Zonunsanga, Lalchhuanpuia, Zosangliana Sailo, David Lalrinchhana (MC Malsawmzuala 84'); Vanlalthlamuana, Malsawmzuala.
Chanmari FC (4-1-4-1) : MS Dawngliana; Thomas Lalengkima, Lalrinchhana Tochhawng, C. Lalrosanga, Ramfangzauva; Reuben Zosangpuia; Lalmuanzova, Lalrinchhana, Rosangliana (Ṭhasiama 20'), Isaac Lalruatpuia (Vanlalbiaa Chhangte 84'), Malsawmfela.
ZoFooty Statistics
Ramhlun North 1 - 3 Chanmari FC
RNFC : Zosangliana Sailo 6'
CFC : Ṭhasiama 57'; Isaac Lalruatpuia 83'; Vanlalbiaa Chhangte 90+3'
MoM : Lalmuanzova, CFC
47% Ball Possession 53%
11 Shot(s) 21
7 On Target 9
2 Yellow Card(s) 2
0 Red Card(s) 0
Powered By Rainbow Multibrand
Mobile Showroom
Team Dinhmun
# Team Pld W D L GF GA GD Pts
1 Chanmari FC 4 3 1 0 9 3 6 10
2 Bethlehem VT 4 3 1 0 4 1 3 10
3 Chhinga Veng 4 1 2 1 6 7 -1 5
4 Ramhlun North 3 1 1 1 2 3 -1 4
5 Chanmari West 3 1 0 2 5 4 1 3
6 Aizawl FC 3 1 0 2 3 2 1 3
7 Zo United 3 0 1 2 0 4 -4 1
8 Dinthar FC 4 0 2 2 4 9 -5 1