Wenger-a mikhual tur Conte

Zanin dar 10:00 hian Arsene Wenger-a'n Emirates Stadium-ah mikhual nghahleLhawm loh a thleng dawn a, a hming chu Antonio Conte a ni. Premier Lea-gue-ah Italian manager hi Wenger nen an intawn vawi khatna tur a nih laiin French pachal tan erawh kum 20 Arsenal enkawl chhunga Chelsea boss a hmachhawn 12-na tur chiah a ni ang.

Ven ngai Costa

'Khelmual chhunga ka chet dan ang ngawt hian ka rilru a chhiain ka sual bik lo' tia lo sawi tawhtu Chelsea striker Diego Costa hian tun season-ah league match nga a khelh aṭangin goal nga a khung leh der tawh. Kum 2015 September thla a Gunners nen an inhmachhawn ṭumin amah vangin Paulista chu hnawhchhuah a lo ni tawh. Spain international lakah hian Laurent Koscielny leh Shkodran Mustafi te minute 90 chhung an fimkhur a ṭul dawn.

Chelsea hian Costa an neih avangin goal khung lamah harsatna an nei lo turah ngaih a ni. Blues hian attacking game khel
ṭhin Arsenal lakah an tlarhnung an ven ṭhat a pawimawh dawn a, an chhuan tur chu an tlarhnung phui hi a ni thung ang. North London club nen league match an khelh hnuhnung pakuaah an tlawm miah lo, a hnuhnung parukah phei chuan goal an chhuah miah lo. Hei mai bakah hian season hmasa khan league-ah vawi hnih an hneh theih avangin an huphurh lo tawp ang.

Terry tel loin

Chelsea boss Antonio Conte chuan, "John a dam hman theih nan theihtawp chhuah mah ila a ngalrek hliam a dam hman loh avangin a inlan thei lo ang. Defender pathum chhawr theih tur ka la neih tho avangin kan buai phah lo ang. Arsenal nena kan inkhel tur hi a pawimawh a, team ṭha tak an nih avangin keini pawh kan khelhṭhat a ṭul a ni," tiin John Terry tel loa an khelh a ṭul thu a sawi a, Blues captain hi match thum chhung a zawnin a inlan tawh lo.

Arsenal boruak a ṭha

Kum dang ang bawkin Arsenal hian player inhliam an ngah leh tawh a, captain Per Mertesacker, Olivier Giroud, Danny Welbeck, Aaron Ramsey, Carl Jenkinson leh Gabriel Paulista te an chhawr thei lo mek. Hetichung hian Wenger-a naute hian beisei aiin an khel ṭha mek a, league match an khelh hnuhnung pathumah hnehna chang vekin League Cup-ah Nottingham Forest chu 4-0 in an sawp hlim bawk.

Wenger-a'n a dan pangngaiin League Cup-ah a chhawr ṭhan loh hlang a luhtir a, zaninah erawh an ṭhat theih dan berin a rawn rem dawn tih a chiang. Ke zungṭang na vanga match hnih khel thei lo tawh Giroud a inlan thei tawh mai thei a, Alexis Sanchez chu hmatawngah a awm leh ngeiin a rinawm. Chile international hian Champions League-a Paris Saint-Germain 1-1 a an hnehtawkna goal a khung bakah league-ah Hull lakah goal a khung zui leh tawh bawk. Kum 27-a upa Sanchez a vul zel theih nan chuan playermaker Mesut Ozil leh Santi Cazorla te an pawimawh leh pek dawn.

Team ṭha pahnih hi an chesual viau a nih loh chuan season tawp lama league nomawi chawi inchuh thei turte zinga mi an ni tura ngaih a ni a, tunah hian point 10 ve ve an hmu. An elpui pakhat Manchester City chu point ngaa an phak loh tawh avangin chet sual an duh tawh dawn lo ve ve a, point thum hmu tur erawh chuan a tu zawk zawk tan pawh 'red card' hmu loh a pawimawh hle ang.

Wenger a zam lo

Arsenal manager Wenger chuan, "Tun hnai kum 10 chhungin Chelsea hi team ṭha berte zinga mi an ni a, anni nena kan inhmachhawn tur hi chu inkhel boruak sang tak a ni lo thei lo. Kan khelh ṭhat tluan lai a ni a, khingpui hautak tak kan neih dawn avangin engtiang chiah nge kan ni tih fiahna hun ṭha tak a ni dawn. Nikum khan kan intawn vawi hnihah khan player 10 ni chungin Chelsea hi kan hmachhawn a, tun ṭumah hian kan result neih
ṭhat mek chhawm nung tur chuan player 11-a kan khelh tluan theih a pawimawh ang," tiin a sawi.

Wenger chuan a khingpui chungchang sawiin, "Liverpool lakah an chak lo a, Swansea lakah point an hloh tawh bawk. Mahse, an khelh dan thlir chuan Conte hian hna a thawk ṭha hlein ka hria, inkhel hautak a ni dawn tih chu a chiang," tiin a khingpui tur manager a fak. Premier League manager ṭanglai zinga a hna ngai chelh rei ber French manager hian Costa chauh ni loin Eden Hazard leh Willian te pawh ven ngun ngai bik an nih tur thu a sawi tel bawk.