Barca-ah Busquest a nghet

Spanish midfielder Sergio Busquets chuan Barcelona-ah kum 2021 thleng khelh chhunzawm turin contract a ziak. Busquets hian May thla khan Nou Camp-a cham zel tur hian thutlukna a lo siam tawh a, Ningani khan contract hi a ziak ve chauh thung.

Kum 28-a upa midfielder chuan, "Ka club nuam tih em emah hun kan hman chhunzawm thei tur hi ka lawm a, ka duhthusam ber chu he club-a ka hun tawp thlenga inkhelh hi a ni. Barcelona kalphung ang hi hmun dangah a awm ve lo, hnehna chan zela inhliam theihna laka kan him zel ka beisei," tiin a sawi.

Spain international hian 2008-09 season-ah khan Barcelona tan Pep Guardiola hnuaiah a senior match hmasa ber a khel a, match 390-ah inlan tawhin Champions Leagues (3), LaLiga (6), Copa del Rey (4), FIFA Club World Cup (3), UEFA Super Cup (3) leh Spanish Supercopa (5) nomawi a chawi a, 2010 World Cup leh Euro 2012 champion Spain team-ah khan a tel bawk.