Aguero hoin City-in Wales tlawh leh dawn
EFL Cup-ah Manchester City-in Nilaini zan khan Liberty Stadium-ah mualneitu Swansea City chu 2-1 in an hneh a, zanin dar 7:30 hian Pep Guardiola hoten Sergio Aguero telin Swans an hmachhawn leh ang.
Wales-ah goal?
Sergio Aguero-a'n club leh ram tan goal 303 an khung tawh a, amaherawhchu Argentine striker hian Wales-ah goal a la khung lo. City forward hian Wales-ah Swansea vawi li hmachhawn tawhin Cardiff vawi khat a khelhpui tawh bawk a, zanin hian a record duhawm lo tak hi thai chhiat a tum ang.
Kum 28-a upa Aguero hian Pep Guardiola hnuaiah penalty vawi hnih a hlah tawh bakah hrem vangin match thum lai inlan thei lo mah se Spanish manager hmanraw pawimawh ber a ni. Aguero hian tun season-a club tan match nga a inlan tawhah goal kua a khung tawh a, Premier League bikah match thumah goal thum a khung bawk.
Match thum khelh loh vangin Aguero hian match fitness a tlakchham phah lo a, hrem a nih lai hian Champions League-a Borussia Monchengladbach 4-0 zeta an sawp ṭumin hattrick a siam nghe nghe.
Player ṭha rual
EFL Cup-ah hrem vanga Aguero khelh theih loh bakah Pep Guardiola-a'n player ṭha a awltir a, tun ṭumah erawh Ilkay Gundogan, Kevin De Bruyne, Fernandinho leh Raheem Sterling ten inkhel bul an ṭan vek rin a ni. Hei chauh hi a ni lo, City tan Gladbach an khelh hmaa inhliam David Silva chu chhawr theih turin a dam tawh bawk.
City hian tun Pep-a hnuaiah vawi riat chak tawhin an club history-a season bul an ṭan ṭhat ber ṭum an hmang mek a, an khingpui tur Swansea hi Premier League match ngaah point li chiah an la hmuh avangin Welsh club tan point khat pawh result ṭha a ni ang.
Pressure nei lo
Swans hi an result a ṭhat loh avangin manager Francesco Guidolin hi a hna chan thei dinhmunah a ding mek a, kum 60-a upa manager thlak tur hian Wales captain hlui Ryan Giggs leh national coach Chris Coleman te hming sawi rik a ni.
Guidolin chuan, "Ka hna chelh lai hi ka hrechiang a, hlauhthawnna ka nei lo. Thuthang awm dan hi football kalhmang a ni hrim hrim a, kan thawhrim phawt chuan result ṭha tak hi kan neih chhoh leh ngei ka beisei," tiin an hmalam hun a êng zawngin a thlir.