Basel hmachhawn tur Wenger a fimkhur
Arsenal-in a zawna a vawi 19 nan Champions League group stage an khel a, zanin dar 12:15-a an mikhual tur FC Basel hi an vawi khat hmachhawnna tur a ni. Emirates Stadium-a leng lut tur Swiss club hi Europe inelna sangah hian an vawi sarih inlanna chuah ni mah se Arsene Wenger chuan fimkhur a ṭul thu a sawi.
Gunners hian kum nga chhung zet an tih theih loh chu tiin kartawp Premier League inkhelah Chelsea chu 3-0 in an sawp a, tun season league match hmasa bera Liverpool an hneh loh hnuah a zawnin match sarih chhung hneh loh an tawng tawh lo - league lama an result ṭha hi Champions League-ah pawh chhawm nun an tum dawn a ni.
Group A-a an match hmasa zawkah Arsenal hian hun tawp dawna Alexis Sanchez-a goal khung hmangin Paris Saint-Germain lakah point khat an hlawh chhuak. Parc des Princes-a hnawh chhuah Olivier Giroud chu match khat khel thei lo tura hrem a nih avangin a inlan thei dawn lo. Chelsea an hneh ṭuma hliam tuar Francis Coquelin bakah Per Mertesacker, Aaron Ramsey leh Danny Welbeck te an la damlo vek bawk.
Nipui transfer laiin Ar-se-nal hian Borussia Mon-chengladbach aṭangin Granit Xhaka an lalut. Swiss international hian kum 2012-a German cub a zawm hmain Basel tan hian a lo khel tawh a, an ram club tan hian match 42 khelin Swiss Super League nomawi vawi hnih a chawi hman. Defensive midfielder Coquelin a hliam takah chuan Xhaka hian a club hmangaih hmasa ber a hmachhawn dawn.
Basel an chhe lo
Basel hian inrintawkna sang tak nen London an pan dawn tih a chiang. Swiss club ṭha hian an match hnuhnung 12-ah hneh loh an tawng lo a, Super League-ah phei chuan match kua an khelh tawhah hnehna chang vekin hmahruaitu an ni. Emirates Stadium-ah chak loh inring saiin an lenglut ngawt bik lo tawp ang tih a chiang.
Gunners mikhual tur Basel hian English club lakah hnuhma chhuan tur an nei, kum 2011 hnu lamah Premier League club lian Liverpool, Chelsea, Tottenhma leh Manchester United te chu Europe inelnaah an lo tuk dawl vek tawh!
Kum hnih liam ta khan Liverpool chu Champions League group stage aṭangin an lo nek chhuak tawh a, hemi kum hma chiah hian Chelsea chu group stage aṭangin an pet chhuak tawh bawk. Kum 2013 April thla khan Spurs chu Europa League aṭanga pet chhukain 2011 khan Sir Alex Ferguson-a enkawl United chu UCL aṭangin an hnawt chhuak bawk - Swiss club hian English club an hlau lo.
Wenger a fimkhur
Arsenal manager Wenger chuan, "Inbuatsaihna ṭha i nei lo a nih chuan i khingpuiin a hrem nghal mai ang che," tiin team nem zawk anga ngaih hmachhawn tur pawha inbuatsaihna ṭha neih a ṭul thu uar takin a sawi. Arsenal hian Swiss club hrim hrim chu vawi li hamchhawn tawhin hnehna an la chang vek a, Basel erawh an vawi khat hmachhawnna tur a ni.
Wenger chuan sawi chhun-zawmin, "Basel hi team nem zawk anga sawi awm mah se kei chuan ka pawmpui ve lo. Tun hnaiah training naa kan zir angin kan khel chhuak thei a, result duhawm pawh kan nei. Ṭha taka khel tur chuan mimal pawimawh bik a hranin an awm lo a, football chu team-a khelh a nih avangin kan ṭanrual a ṭul a ni," a ti. French manager hian English club lian dangte lo chetsual tawhna a theihnghilh lo tih a chiang.
PSG vs Ludogorets
Zanin dar 12:15 vek hian Group A inkhel dangah Ludogorets chuan Paris Saint-Germain an lo mikhual ang. Club pahnihte hi an hlutna a inthlau hle. Tun dinhmunah Bulgarian club player-te hlutna behkhawm chu pound maktaduai 39 vel a nih laiin PSG erawh pound maktaduai 357 vel a ni hem mai! An hlutna hi inthlau viau mah se tunah hian point khat ve ve an nei mek a, chak chiang sa a sawi theih bik loh. Chutihrualin PSG hi chungnung zawk tura ngaih an ni a, team enkawltu Unai Emery hian a club hmasa Sevilla chu Europa League nomawi a zawnin vawi thum chawi pui a thei a ni.