Indian Super League Tute nge ISL club neitute chu?

Football-in hmun pawimawh a chan phak lohna India ramah football a lar theih nan Indian Super League siam a ni a, season hnih khelh tawh niin khawvela a hmuna league entu tam lama palina a ni phak der.

ISL-in khawvel huapa footballer langsar lo ni tawh ṭhin leh player beiseiawm bakah coach langsar tak tak a hip khawm reng a, hmanni lawka television kaltlang baka kan hmuh phak loh player-te khan India leilungah ngei football an pet ve ta.

"Enge a chhan?" tia zawhna awm thei chu awlsam taka chhan theih a ni - sum awm vang tih hi a ni mai.

European football-ah tun hmaa club lian ni ngai lote meuh pawhin Russia leh Arab oil mawm an chawm meuh chuan sum hmangin player ṭha an hip khawm a, tunah chuan khawvela club lian zingah chhiar tel loh an thiang tawh lo - ISL club zingah hausa ber anga chhal bik tur an vang a, an sum neih dan hi a namai lo hlawm hle.

Hetihlai hian ISL lam mi leh sa ni ṭhin hnen aṭanga Vanglaini thu dawn danin ISL team pariat zinga team paruk neitute hi Reliance (Ambani-te chhungkua) nena inzawmna nei thuk tak vek an ni. A ṭhen hi chu sumdawnna lama an direct leh in-direct partner an ni. Football-a an tuina lam aiin Ambani-te nen sumdawnnaa inzawm zel an duh vangin ISL-ah hian an zuang lut a ni ber.

ISL team tin hian hian kum khatah India tangka cheng vaibelchhe30 zet an hloh ziah anga ngaih a ni. Tun anga an kal zel chuan kum thuma vaibelchhe 100 vel hloh tura ngaih an ni a; nimahsela Reliance Sports CEO Sundar Raman chuan kum 2017 hnu lamah chuan a hlawkna an hmuh a beisei thu a sawi ve thung.

Atletico de Kolkata

ISL champion hmasa ber neitu hi Kolkata Games and Sports Pvt. Ltd niin he company-ah hian India cricket captain hlui, dollar maktaduai 55.5 nei anga an chhut Sourav Ganguly, Neotia group chairman Harshavardhan Neotia, dollar tluklehdingawn 1.41 neitu Sanjiv Goenka, SMIFS Capital Markets Ltd-a non-executive chairman Utsav Parekh leh khawvela club hausa 14-na Atletico de Madrid te an tel a, an it zawng lei turin sum an nei tawk.

Chennaiyin FC

Jeje Lalpekhlua khelhna Chennai club neitu te hi Bollywood actor Abhishek Bachchan, Vita Dani leh Indian cricketer Mahendra Singh Dhoni te an ni. Abhishek-a mimal hausakna hi dollar maktaduai 30 vel nia chhut a ni a, a nupui chhelo zet Aishwarya Rai hian dollar maktaduai 35 neiin a pa Amitabh Bachchan hausakna hi dollar maktaduai 400 a ni. Khawvel infiammi zinga sum lalut hnem pawl Dhoni hian dollar maktaduai 100 vel neiin Asian Paints chhungkuaa mi Dani hian sum a nei tlem lo ang tih hriatsa a nih bawk avangin Jeje-a hlawh an bat sak lo tawp ang.

Delhi Dynamos

Dynamos neitu DEN Networks chuan kumin kumtir khan share 55% chu GMS Group hnenah hralhin a bak 45%-ah erawh neitu an la nih chhunzawm zel. GMS hi khawvela lawnglian recycling sumdawnnaa lian ber an nih avangin an sum neih a tam ang tih hai rual a ni lo a, DEN lah hi ISL season hmasa bera thla thum chhunga Alessandro Del Piero hlawh atan ringawta vaibelchhe 11 inseng thei kha an nih miau avangin an bank account balance digit hi phone number nen a in ang vel ang tih a chiang reng.

FC Goa

Dattaraj Salgaocar leh Shrinivas Dempo an inhnuhdawh hnuah Delta Corp Ltd. chairman Jaydev Mody chuan Goa-ah share leiin a hausakna hi chiang taka hriat theih ni lo mah se Daman-a a hotel pakhat hlut zawng ringawt pawh vaibelchhe 400 hu a ni a, tun hnaiah Real Estate sumdawnna luhchilhin vaibelchhe 500 a inseng bawk. Goa neitu zingah Videocon chairman Venugopal Dhoot hausakna hi dollar tluklehdingawn 1.16 vel a ni a, an zinga rethei ber cricketer Virat Kohli sum neih zat dollar maktaduai 46 ringawt pawh hian lei theih a ngah ngawt ang!

Kerala Blasters

Blasters neitu zinga lar ber Cricket legend Sachin Tendulkar hausak zawng hi dollar maktaduai 160 zet a ni a, Telugu superstar Chiranjeevi-a'n dollar maktaduai 16.3 neiin amah ang thoa film star Akkineni Nagarjuna hausakna chu dollar maktaduai 50 a ni bawk. Industrialist Nimmagadda Prasad-a'n Matrix Laboratories-a a share 71.5% a hralh khan vaibelchhe 570 zetin a hausak belh a, an zinga nei tlem ber Tollywood film producer Allu Aravind hian dollar maktaduai 5 neiin dinchhuah pui tham chu a la ni.

Mumbai City

Nicolas Anelka meuh lo chah chhuak tawhtu Mumbai City neitu te hi Bollywood actor Ranbir Kapoor leh Bimal Parekh te an ni. Ranbir Kapoor hausak zawng hi dollar maktaduai 30 niin a pa Rishi Kapoor hian dollar maktaduai 40 a nei a, a nu Neetu Singh pawh hi a hunlaia actress lar a nih avangin thawmhnaw dawra price tag check hmasa ber ṭhin ang chu a nih a rinawm loh. Ranbir-a thawhpui Bimal hi a hausak zawng hriat theih ni lo mah se India rama chartered accountant lar ber pawl a nih miau avangin a sum neih a tlem thei lo.

NorthEast United

ISL ṭantirha Highlanders neitu zinga mi Shillong Lajong neitupa Larsing Ming a inhnuhdawh hnuah John Abraham chu NorthEast United neitu awm chhun a ni. Bollywood actor lar hausakna hi dollar maktaduai 25 vela chhut niin ṭhenkhat chuan dollar maktaduai 80 vel niin an tarlang bawk. A nupui Priya Runchal hi financial analyst ni bawkin a nei ve ṭan tura ngaih a ni a, mimalin a enkawl a nih miau avang erawh chuan NorthEast United hi ISL club-a rethei berah ngaih an ni.

FC Pune City

Bollywood actor chhelo Hrithik Roshan chu Pune City neitu langsar zinga mi niin a hausak zawng hi dollar maktaduai 30 bawr vel nia chhut a ni a, a thawhpui Wadhawan Group neitu Kapil & Dheeraj Wadhawan unau hausakna hi dollar maktaduai 650 bawr vel niin an player duhzawng lalut turin sum an ngah tawk.