Barcelona leh City an inlan dawn
Zanin dar 12:15-ah Champions League inkhel a awm nual dawn a, Group C-a club ngaih-ven hlawh pahnih Barce-lona leh Manchester City an inlan dawn.
Champion rinkai Barcelona-in khualmualah German club Borussia Monchengladbach an lenchilh ang a, Pep Guardiola enkawlna hnuaia season duh-awm tak hmang mek Man-chester City hian Celtic an lenchilh ve bawk ang.
Messi tel loin
Barcelona-in defender Samuel Umtiti bakah an thiampuipa Lionel Messi chu hliam vangin an la chhawr thei dawn lo a, hetichung hian Messi tel dawn loh vang a kut lo ben ringawt erawh Borussia Monchengladbach tan thil tih chi a ni chuang lo - Luis Suarez leh Neymar an la awm tlat!
Catalan club tan South American forward pahnih hian an match hnuhnung bera Sporting Gijon 5-0 a an sawp ṭumin goal an khung ve ve. Suarez hian tun season-ah match riat khelin goal riat a khung leh der tawh a, Neymar-a'n vawi nga inlanah goal li a khung tawh bawk.
Gladbach tana hriat nuam lo tur chu Messi awm loh apiangin Neymar-a'n a khel ṭha zawk! Brazil captain hian Messi nena an khelhdun aṭanga chhutin minute 157.8 dan zela goal khung ang a ni a, Messi tel loin minute 80 dan zela goal khung ang a ni thung.
Barcelona-in Champions League-a an match hmasa berah Celtic chu 7-0 ngawtin an sawp a, duhthusama ṭhain Luis Enrique-a naute hian inelna bul an ṭan. Gladbach hi City laka 4-0 a tlawm an ni thung a, Pep Guardiola-a club hlui hian an pu hlui hnathawh an chhunzawm ve thei dawn em? tih chu zaninah a chiang ang.
Zuam sual theih
Barcelona tan Gladbach hi a pawng taka zuam ngawt chi an ni bik lo. German club hian Bundesliga-ah match nga khel tawhin vawi thum hnehna an chang thei a, vawi khat tlawmin vawi khat draw result an nei thung. Gladbach hi mahni khelmual hmang thiam tak an ni - match 11 chhung chu an khelmualah tlawm hmel an hmu tawh lo a, he record thaichhe thei an awm a nih chuan Barcelona aia ṭha zawk thlan tur erawh an vang ang.
German club hian hliam vangin an attacking midfielder chhuanvawr Raffael an chhawr thei dawn lo a, midfielder Tobias Strobl chu a inlan theih a beiseiawm loh bawk. Barcelona keeper Marc-Andre ter Stegen-a'n amah siam liantu club a hmachhawn dawn a, zanin hi a tan inkhel danglam bik tur a ni.
Pep-a hoin City
Pep Guardiola-a'n Manches-ter City chu Champions League nomawi beisei tur khawpa an la ṭhat tawk loh thu sawi mah se an match hmasa berah 4-0 a hnehna chang nghalin inelna hrang hranga vawi 10 an inlan tawhah hnehna an la chang fai vek!
Zaninah Premier League club hian British Derby khel turin Celtic an lenchilh dawn a, an hmachhawn tur club hi Barca laka mualpho tawh an nih avangin an zuam sawtin a rinawm. Mahse, Celtic boss Brendan Rodgers chuan, "Barcelona laka kan khelh ang hne hne kha chuan kan khel tawh dawn lo a, City hi huaisen takin kan hmachhawn dawn a ni," tiin a sawi a, English club a hlau bik lo.
Celtic hian an khelmuala match an khelh hnuhnung pasarihah tlawm hmel an hmu miah lo a, an match hnuhnung berah Kilmarnock chu 6-1 a an sawp bawk avangin Rodgers-a sawi ang ngeiin Scottish club hi Celtic Park-ah chuan tum huaisen tak an ni ngeiin a rinawm.
Rodgers-a'n hliam vangin a midfielder Mackay-Steven chhawr thei dawn lo mah se rei tak a inhliam hnuah Croatian defender Jozo Simunovic a lo kir leh tawh thung. City hian captain Vincent Kompany an chhawr thei dawn lo a, a Belgian pui Kevin De Bruyne pawh a inlan theih a beiseiawm loh.