Lewis Hamilton a inringtawk

Formula 1 world champion Lewis Hamilton chuan a champion nomawi humhim turin a teammate Nico Rosberg a lehthal tura a inrintawk thu a sawi chhuak.

Pathianni hian Malaysian Grand Prix tlan a ni dawn a, tun season-ah intlansiak paruk chauh tlan hmabak awm tawhin tun dinhmunah hmahruaitu Rosberg (273 points) aiin British driver hi point riatin a hniam mek.

Kum 31-a upa Hamilton chuan, "Hmahruaitu ni leh tur chuan result ṭha ka neih a ngai a, chumi tur chuan inrintawkna ka neih a ṭul. Hun rei tak hmahruaitu ka nih theih avangin ka hmun ngaia kir leh turin theihna ka nei tih ka chiang a, ka zam lo," tiin a sawi.

July thla kha chuan Hamilton hian Rosberg lakah hian point 19 zeta falin hmahruaitu a ni a, tun hnai intlansiak hnuhnung pathumah German driver a chungnun tak vek avangin hmahruaitu an inthlak a ni.

Hamilton chuan Singapore thlir kirin, "Ka tan kartawp ṭha tak a ni loh tih chu ka hria, chu bakah Nico kha a tlan ṭha takzet a dan theih a ni lo. Team inang ni mah ila pakhatna nih duh ve ve kan nih avangin kan inel chhunzawm zel ang," tiin a sawi.