Aizawl FC an huaisen

Chhinga Veng FC-in coach thar Chawngthansanga leh keeper thar Isaac Vanlalpeka te nen Aizawl FC lakah hun rei zawk hma hruai mah se minute 90 a zawh meuh chuan team huaisen K. Malsawmkima hoten hnehna an chang.

Aizawl FC-in match hnih a zawna an chak loh hnuah Thawh-
ṭanni zan khan MPL kaithar Chhinga Veng FC chu hun tawp dawnah 2-1 in an lehthal.

Kai thar leh champion lai inthlauhna a tam loh bakah Lammualah club supporter-te'n thawm an neih ṭhat avangin MPL5 a nung zel tih a chiang hle.

Coach thar hnathawh

Zo United (Reitlang FC) leh Chanmari West FC enkawl tawh-tu Chawngthansanga'n a ken tel chu phurna a ni a, K. Kawla Stand-a khat tlat Chhinga Veng mipui an phur tih a hriat theih ang chiahin player-te an phur bawk.

Chawnga hian MPL ṭan hmaa sawi hlawh tak Shillong Lajong tan pawha khel tawh Joy Mrona Khar Raswai chu starting eleven-ah a tel nghal a, Khasi midfielder hi match li khelh tawhah vawi khat mah a inlan lo.

Football hmuhnawm

Chhinga Veng FC-in inkhel bul ṭan mah se Joy-a pass fimkhur tawk loh chu AFC rawlthar striker Lalremsanga'n chhuhsakin Rohmingthanga a pe leh nghal a, Lengpui tlangval hian a thiamna lantir mah se referee-in offside (?) vangin a pawm sak lo.

Hemi hnu hi chuan club pahnihin game rang tak an khel a, Lalkhawpuimawia an neih avangin MPL kaithar goal nawr a na zawk. Kelkang tlangval Mapuia hian a ball pet hmasak zawk goal zawnah pet lo mah se a vawi hnih petna erawh AFC keeper Zothanmawia tan man ngheh chi a ni lo a, a per let chu Vanlallawma'n chiang takin minute ngana lekah a khung.

First half-ah Chhinga Veng an hmuhnawm zawk a, team pahnih hian penalty shout ṭum khat ve ve nei mah se pek an ni lo.

MPL kaithar hi keeper chetsual avanga match hnih point an hloh tawh avangin keeper thar Isaac-a'n en bik a hlawh a, Kolasib tlangval hian a theihna sang tak pho chhuakin a ball vawm leh ball pet na takte chu Chhingcows lawmna niin a theihna tak tak lang tur erawh chuan fitness tih ṭhat a la ngai thung.

Malsawmna Mala

K. Malsawmkima'n Gha-naian striker Bright Middleton Mends a chhawr theih loh zanah AFC academy chhuak player pahnih a chhawr a, bo-ruak a sang lutuk hret tih hriain minute 39-naah Vanlal-ṭhazuala aiah B. Zoramthara a luhtir a, khelmual chhungah tawnhriat nei player danglamna a lang.

Chanmari West coach hlui Chawnga'n loh theih lohin defensive game a khelh a ṭul a, amaherawhchu minute 53-na-ah Dinthar FC an draw ṭuma ball chhuhsak tam vanga man of the match-a thlan inhliam Isaac Lal-remruata aiah tharum ngah lo zawk Lalsawmzela a luhtir a, midfielder khel ṭha ber (?) Joy-a chu minute 72-naah a thlak bawk.

Chhinga Veng keeper Isaac-a rim chho a, ropui tak takin dang ṭhin mah se mihring ve tho a ni. Minute 78-naah freekick aṭanga Rohminga ball vawrh chu vengtu nei lo Chullova'n a tauh lut a, Chhinga Veng tana pawi lai chu player ang thoin supporter-ten beiseina nung an nei lo.

Hun tawpah tawnhriat nei zawk AFC danglamna a lang a, MPL kaithar player-te'n ven mumal nei loa tlarhnung an inhnawh ve ringawt an tuar bawk.

Minute 83-naah AFC rawlthar striker Remsanga'n hnai tak aṭangin chance ṭha a hlah a, minute 90-naah Rohminga pass chu Ricky Lallawmawma'n vei lama awm Brandon VL Remdika pe lehin substitute Lalnuntluanga'n chakna goal a khung.

Goal luhna tura inrawlh AFC player-te'n vengtu an nei lo vek hi coach thar Chawnga'n Chhinga Veng siamṭha turin hna a la ngah tih tichiangtu a ni.

Eng nge an sawi?

Chhinga Veng coach Chawng-thansanga chuan, "Joy kha yellow card a hmuh tawh avangin ka la chhuak a, Isaac kha first half-ah Chullova'n a pet avangin a hliam bawk a, loh theih lohin lakchhuah a ṭul a ni. Ni khat chiah kan la training avangin player-ten tihtur an la chiang tawk lo a, hun tawp boruak sangah kan tuar ta a ni," tiin Vanglaini palai a hrilh.

Coach thar Chawnga chuan Chhinga Veng mipui ṭawiawmna vanga a lawm thu a sawi a, ṭan tlak ni tura rim zawka an thawh tur thu a sawi tel bawk.

Aizawl FC coach K. Mal-sawmkima chuan, "Kan tum ber chu chak an ni a, ka duh ber point thum kan hlawhchhuah avangin kan result-ah ka lung-awi," tiin inkhelh banah a sawi.

Chhinga Vengin Ningani tlaiah hneh loh la tawng lo Be-thlehem VT an hmachhawn dawn a, Aizawl FC-in hemi zan hian table mawngphaha awm Din-thar FC an hmachhawn thung ang.

Tute nge inlan?

Chhinga Veng FC (4-2-3-1) : Isaac Vanlalpeka; Lalthlamuana, Joseph Lalnunpuia, Vanlalthanga, Lalramfelpuia; Joy Mrona Khar Raswai (Lalchhanchhuaha 72'), Paul Ramfangzauva; Vanlallawma (H. Lalthlahlova 85'), Isaac Lalremruata (Lalsawmzela 53'), H. Lalmuankima; Lalkhawpuimawia.

Aizawl FC (4-3-3) : Zothanmawia; Lalhriatrenga, Lalrinzuala, Lalramchullova, Ricky Lallawmawma;Vanlalṭhazula (B. Zoramthara 39'), H. Lalbiakthanga (Lalnuntluanga 66'), Rohmingthanga; Albert Zohmingmawia (Lal-
ṭhakima 90+4'), Lalremsanga, Brandon VL Remdika.

ZoFooty Statistics

Chhinga Veng FC 1 - 2 Aizawl FC

CVFC : Vanlallawma 5'

AFC : Lalramchullova 78'; Lalnuntluanga 89'

MoM: Lalramchullova, AFC

47% Ball Possession 53%

9 Shots 16

3 On Target 9

3 Yellow Cards 2

0 Red Cards 0

Powered By Rainbow Multibrand

Mobile Showroom