Bayern tan phuba lakna hun ṭha a inherchhuak

Season hmasa Champions League semifinal-ah Bayern Munich-in Atletico Madrid ngam loin a zawna a season thum nan a thiam pali zing aṭanga paih-chhuah an ni a, Cham-pions League nomawi duhtu Pep Guardiola-a'n rilru kim lo tak chungin German club a chhuahsan a ngaih phah.

Bayern Munich-in Cham-pions League-a tawnhriat ngah tawh coach Carlo Ancelotti enkawlna hnuaiah Europe-a a thiam ber nih tumin hma an la a, season hmasaa an ngam loh Atletico chu zanin dar 12:15 hian group match khel turin khualmualah an lenchilh dawn.

Atletico Madrid-in tun season Champions League-a an match hmasa ber chu khualmualah khelin PSV Eindhoven 1-0 in an hneh a, Bayern Munich hi 5-0 a FC Rostov hnehtu an ni thung - zanin inkhel tur hi Group D hmahruaitu tur zawnnaa ngaih theih a nih avangin a hmuhnawm lo thiang lo.

Inrintawkna nen

Atletico Madrid-in tun sea-son-ah competitive match sarih khel tawhin tlawm hmel an la hmu lo a, vawi li hnehna chang tawhin vawi thum an khingpui nen an inhnehtawk. Atletico hmingṭhatna chu an khelmual an hmangthiam hi a ni. Madrid khaw club hian Europe inelnaa an home match hnuhnung 30-ah vawi hnih chiah an chak lo a, vawi 25 hnehna an chang thei - nikuma an hneh tawh Bayern mikhual hi an hlau lo tawp ang.

Tun season-a an khelh dan en chuan Bayern aia inringtawk tur club hi an awm chuang lo. Italian coach ropui Ancelotti hnuaiah German club hian match riat khelin vawi riat hnehna an chang tawh - khualmualah match li chhung a zawna hnehna chang tawhin goal 10 an khung a, goal chhuah an nei miah lo. Khualmuala zin chhuak turin Bayern aia inringtawk tur club an awm tawh chuang lo.

Hmanah chuan...

Kum 1974 khan European Cup hming chawia Champions League khelh a nih laiin club pahnih hi final-ah an lo intawng tawh a, Bayern-in hnehna changin champion nomawi an chawi.

Nikum semifinal-a team pahnih an intawn khan an inngam tawk hle. Atletico Madrid khel-mualah first leg khelh niin Saul Niguez solo goal hmangin mual-neitu club hi 1-0 in an chak.

Munich khawpuia an intawn leh hnuah Xabi Alonso leh Robert Lewandowski hmangin Bayern-in goal khung mah se Antoine Griezmann-a'n Atletico tan goal pawimawh a khung a, away goal rule hmangin Atletico-in final an lut.

Atletico hian German club an mikhual tawh vawi 17-ah vawi 12 hnehna changin vawi thum an tlawm a, vawi hnih an inhnehtawkpui. Bayern hian Spain lama zin an ngeih lo hle! Vawi 24 an zin tawhah vawi 13 an tlawm a, vawi ruk chiah chak hmel hmuin vawi nga dang an inhnehtawk.

Tu nge en bik tur?

Atletico Madrid tan Antoine Griezmann bawk hi en bik hlawh leh tur a ni. Nikuma Bayern hremtu forward hian tun season-a match ruk a khelh tawhah goal nga a khung leh der tawh a, Bayern hrem nawn turin a ṭha tawk.

Tunlai khawvela striker hlauh--awm pawl sawi a nihin Robert Lewandowski hming lam hmaih a ni ngai lo. Polish striker hian tun season-ah Bayern tan match riat khelin goal kua a kung tawh a, tlarhnung ṭha Atletico-in an dan zawh dawn leh dawn loh a hriat thuai dawn.

Chhuanlam duh lo Simeone

Atletico Madrid-in Pathianni zana Deportivo La Coruna an hneh ṭumin defender Jose Gi-me-nez leh midfielder Augusto Fernandez te chu hliam vangin lak-chhuah an ni a, Bayern an hma-chhawn theih a beiseiawm loh.

Mahse, Atletico Madrid boss Diego Simeone chuan Bayern lakah chhuanlam neih a tum loh thu a sawi. Argentine coach hian Deportivo an hneh ṭumin, "Hahdam takin kan mu ang a, ei leh in tur ṭha takin kan eiin kan in ang a, training pangngai tak neiin chhuanlam awm miah loin Bayern kan khel ang," a ti a, chhuanlam neih a tum lo.

Bayern-in hliam vangin defender Holger Badstuber leh winger Douglas Costa chhawr thei dawn lo mah se Hamburg an hneh ṭuma inhliam Mats Hummels-an training a zawm leh a, German international hi Atletico hmachhawn tura a in fit hman beisei a ni.