AFC Cup Champion lai khelmualah Bengaluru

I League champion Bengaluru FC chuan an club chanchina a vawi khat nan zanin dar 6:15 hian AFC Cup semifinal an khel dawn a, champion lai Johor Darul Ta'zim (JDT) chu khualmualah an hmachhawn dawn - inkhel hi Star Sports2 chuan live-in a pe chhuak dawn a ni.

Team pahnih hi tun hnai kum hnih chhunga vawi thum lo inhmachhawn tawh niin Malaysian Super League champion hian hnehna an la chang fai vek a, zaninah Bengaluru hian thawnthu danglam zawk ziah tumin an khel ang.

Bengaluru tan left back rinrawl Lalchhuanmawia Fanai chu hliam vangin a la inlan thei dawn lo a, Mizo player zing-ah striker Daniel Lalhlim-puia, midfielder Malsawm-zuala, goalkeeper Lal-thuammawia Ralte leh winger Beikhokhei Bei-ngaichho te chuan ṭum dang ang thoin bench lam-ah hun an hman rin a ni.

JDT hian tlarhmaah January aṭanga goal 27 khung tawh Pereyra Diaz leh goal 30 khung tawh Martin Lucero te an nei a, Argentine forward pahnih dan hi Bengaluru tlarhnung tan hna hautak a ni dawn.

Bengaluru coach Albert Roca chuan, "India ramah league kan khelh tawh loh avangin kan inkhel tlem em em a, Malaysia-a inkhelh hi a harsa dawn. Mahse, ka nau te an tumah an chiang a, final khelh ngei tumin theihtawp an chhuah ang," tiin a naute a rintawk thu a sawi.

Semifinal kalkawng

Group Stage

Lao Toyota 2 - 1 Bengaluru

Bengaluru 0 - 1 Johor Darul Ta'zim

Ayeyawady United 0 - 1 Bengaluru

Bengaluru 5 - 3 Ayeyawady United

Bengaluru 2 - 1 Lao Toyota

Johor Darul Ta'zim 3 - 0 Bengaluru

Last 16

Kitchee SC 2 - 3 Bengaluru

Quarterfinal

Bengaluru 1 - 0 Tampine Rovers (first leg)

Tampine Rovers 0 - 0 Bengaluru (second leg)