I League khel tur Aizawl FC

Season hman zawh taka I League aṭanga tla Aizawl FC chuan season tharah I League an khel leh dawn! All India Football Federation (AIFF) executive committee chuan January 7, 2017 aṭanga khelh ṭan leh tur I League-a Aizawl FC an tel tur thu hi an tichiang tawh a ni.

AIFF president Praful Patel chuan, "Aizawl FC chuan I League an khel leh dawn. Hmun hrang hrang aṭanga I League khelte chawi nun zel hi kan tum a ni a, chumi avanga he thutlukna pawh hi siam kan ni," tiin Aizawl FC chu Mizoram aṭanga I League khel awm chhun an nih avanga India club inelna sang bera telh leh an nih thu a sawi.

Patel chuan I League aṭanga inhnukdawk tur anga sawi Dempo SC leh Sporting Clube de Goa chuan I League an khelh chhunzawm tur thu a sawi nghal a, Aizawl FC chu inhnukdawk chiang tawh Salgaocar hmun ruak luah tura koh an nih loh thu a sawi bawk.

Indian FA hotupa chuan, "Aizawl FC hi Salgaocar hmun ruak luah tura tih an ni lo. Club leh sumdawng engemaw zatin I League khelh an duh a, min betu an awm reng avangin advertisement pawh kan la ti chhuak ang," tiin a sawi.